بۇگىن ەلوردادا فۋتبولدان قازاقستان كۋبوگىنىڭ فينالى وتەدى.
كەزدەسۋ ەلوردا ۋاقىتىمەن 16.00-دە استانا قالاسىنداعى «استانا-ارەنا» ستاديونىندا وتكىزىلەدى، دەپ حابارلايدى Almaty-akshamy.kz.
فينالدا شىمكەنتتىڭ «ورداباسى» جانە قوستانايدىڭ «توبىل» كوماندالارى شەبەرلىك بايقاسادى.
ويىن «Qazsport» تەلەارناسىنان تىكەلەي ەفيردە كورسەتىلەدى.
بيىل شىمكەنتتىك كلۋب ەل چەمپيونى اتانسا، قوستانايلىق كوماندا سەگىزىنشى ورىندى مىسە تۇتتى.
فينالعا دەيىن «ورداباسى» تۇركىستان وبلىسىنىڭ «ماقتارالىن» (1:2، 4:1)، پەتروپاۆلدىڭ «قىزىلجارىن» (2:0، 0:1)، ەلوردالىق «استانانى» (0:1، 2:0) ورتا جولدا قالدىرىپ كەتتى.
ال «توبىل» پاۆلودار وبلىسىنىڭ «اقسۋ» (1:2، 2:0)، قاراعاندىنىڭ «شاحتەر» (0:1، 2:0)، «اتىراۋ» (1:0، 1:0) كوماندالارىن جەڭدى.
ايتا كەتسەك، قازاقستان كۋبوگى 1992 جىلدان بەرى تۇراقتى تۇردە وتكىزىلىپ كەلەدى. بۇگىنگە دەيىن «قايرات» 9 مارتە كۋبوكتى توبەسىنە كوتەردى.
ال «جەڭىس» (استانا) مەن «استانا» - 3، «قايسار» (قىزىلوردا) مەن «ورداباسى» (شىمكەنت) - 2، «ەرتىس» (پاۆلودار)، «تاراز»، «شاحتەر» (قاراعاندى)، «ۆوستوك» (وسكەمەن)، «اقتوبە»، «الماتى»، «توبىل» (قوستاناي)، «دوستىق» (الماتى)، «ەلىماي» (سەمەي) - 1 مارتەدەن كۋبوك يەگەرى اتاندى.