فۋتبولدان پرەمەر-ليگا كوماندالارى اراسىنداعى ەل بىرىنشىلىگىنىڭ 13-تۋرىنىڭ العاشقى ويىن كۇنى اياقتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
العاشقى ويىندا «شاحتەر» (قاراعاندى) مەن «اتىراۋ» 0:0 ەسەبىمەن تەڭ ءتۇستى.
تاعى ءبىر كەزدەسۋدە ورالدىڭ «اقجايىعى» ءوز الاڭىندا اقتاۋدىڭ «كاسپيي» كلۋبىن 2:0 ەسەبىمەن تىزە بۇكتىردى.
سونداي-اق، العاشقى ويىن كۇنىن «ماقتارال» (تۇركىستان وبلىسى) مەن «تۇران» (تۇركىستان) كەزدەسۋى قورىتىندىلادى.
ويىن بارىسىندا قوس كوماندانىڭ بىر-بىرىنە گول سوعاتىن مۇمكىندىگى از بولعان جوق. تۋرنير كەستەسىندە تومەنگى ورىنداردا كەلە جاتقان كوماندالار ءۇشىن جەڭىسكە جەتۋ اۋاداي قاجەت بولاتىن. كەزدەسۋدىڭ 47-مينۋتىندا «ماقتارال» ويىنشىسى رامازان كاريموۆ ەسەپ اشتى.
ال 94-مينۋتتا عالىمجان كەنجەبەك ەسەپتى ۇستەمەلەي ءتۇستى.
وسىلايشا «ماقتارال» قارسىلاسىنان 2:0 ەسەبىمەن باسىم ءتۇستى.
ەندى 21 تامىزدا «توبىل» (قوستاناي) مەن «تاراز»، «استانا» (نۇر-سۇلتان) مەن «قىزىلجار» (پەتروپاۆل) شەبەرلىك بايقاسادى.
سونداي-اق، «اقتوبە» مەن «ورداباسى» (شىمكەنت)، «اقسۋ» (پاۆلودار وبلىسى) مەن «قايرات» (الماتى) جاسىل الاڭعا شىعادى.
ويىندار «Qazsport» جانە پفلك-تۆ ارقىلى تىكەلەي ەفيردە كورسەتىلەدى.