FIFA WORLD CUP QATAR 2022 مونەتالارىنىڭ ديزاينىن FIFA حالىقارالىق فۋتبول فەدەراسياسى بەكىتكەن.
قازاقستاندا «سپورت» مونەتالار سەرياسىنان FIFA WORLD CUP QATAR 2022 كوللەكسيالىق مونەتالار اينالىمعا شىقتى، دەپ حابارلايدى Almaty-akshamy.kz.
مونەتالار قازاقستان ۇلتتىق بانكى، قازاقستان مونەتا سارايى مەن MDM نەمىس نۋميزماتيكا كومپانياسى اراسىنداعى ءۇشجاقتى كەلىسىم اياسىندا شىعارىلدى. ساتىلىمعا تۇسەتىن داتانى ۇلتتىق بانك قوسىمشا حابارلايتىن بولادى.
FIFA WORLD CUP QATAR 2022 مونەتالارىنىڭ ديزاينىن FIFA حالىقارالىق فۋتبول فەدەراسياسى بەكىتكەن. شاقادا رەلەفتى ورتاشا دەڭگەيدە التىنمەن جالاتۋ بويىنشا جاڭا تەحنولوگيا قولدانىلىپ وتىر. ول مونەتالىق وندىرىستە العاش رەت پايدالانىلدى جانە دوپتىڭ كولەمىن ءبولىپ كورسەتۋگە مۇمكىندىك بەرەدى.
كوللەكسيالىق مونەتالار التىن جالاتۋ تەحنولوگياسى قولدانىلا وتىرىپ، 925/1000 سىنامالى كۇمىستەن جاسالدى. ماسساسى 20 گرامم، ديامەترى 37 مم، نومينالى 100 تەڭگەلىك، جالپى تارالىمى 4 مىڭ دانا. ىشكى نارىق ءۇشىن تارالىمى – 3 650 دانا، سىرتقى نارىق ءۇشىن – 350 دانا.
شاقالار قازاقستاننىڭ بۇكىل اۋماعىندا ءوزىنىڭ بەلگىلەنگەن قۇنىمەن تولەمنىڭ بارلىق ءتۇرى بويىنشا قابىلدانۋعا جاتادى.