وسىعان دەيىن ەكى رەت الەم چەمپيونى اتانعان فرانسيا بيىل دا فاۆوريتتەردىڭ ءبىرى بولدى
قاتاردا فۋتبولدان ءوتىپ جاتقان الەم چەمپيوناتىندا فرانسيا مەن ماروككو قۇرامالارى فينالدىڭ جولداماسى ءۇشىن جاسىل الاڭعا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وسىعان دەيىن ەكى رەت الەم چەمپيونى اتانعان فرانسيا بيىل دا فاۆوريتتەردىڭ ءبىرى ەكەندىگىن ايقىن تانىتتى.
ديدە دەشام فرانسيا قۇراماسىنىڭ كاپيتانى رەتىندە الەم جانە ەۋروپا چەمپيونى اتانسا، باپكەرلىك مانسابىندا دا سەنىممەن العا باسىپ كەلەدى. بۇدان ءتورت جىل بۇرىن ونىڭ باسشىلىعىمەن ەل قۇراماسى التىن مەدالدى جەڭىپ العان ەدى.
ال ۆاليد رەگراگي جاتتىقتىراتىن ماروككو قۇراماسى بيىل ايدى اسپانعا شىعارىپ، افريكا ەلدەرى اراسىندا العاش رەت جارتىلاي فينالعا ءوتتى.
بۇل ويىندا فرانسيا قۇراماسىنىڭ جاساعان العاشقى شابۋىلى-اق ءوز جەمىسىن بەردى. انتۋان گريزماننىڭ پاسىنان كەيىن كيليان مباپپەنىڭ ەكى سوققىسىن ماروككو قورعانىسى قايتارعانىمەن، ءبىرىنشى بولىپ جەتكەن تەو ەرناندەس 5-مينۋتتا دوپتى قاقپادان ءبىر شىعاردى – 1:0.
بۇدان كەيىن قوس قۇرامانىڭ دا مۇمكىندىكتەرى بولعانىمەن، ءبىرىنشى تايمدە ەسەپ وزگەرگەن جوق.
ەكىنشى كەزەڭدە ماروككولىقتار كوبىرەك شابۋىلداعانىمەن، ودان ەشتەڭە شىعارا المادى. ەسەسىنە 80-مينۋتتا كيليان مباپپەنىڭ بىرنەشە ويىنشىنى الداپ ءوتىپ، قاقپاعا باعىتتاعان دوبىنا الاڭعا تىڭنان قوسىلعان رەندال كولو مۋاني اياعىن قويا سالدى – 2:0.
وسىلايشا، ماروككونى 2:0 ەسەبىمەن تىزە بۇكتىرگەن فرانسيا 18 جەلتوقساندا مەسسي باستاعان ارگەنتينا قۇراماسىمەن التىن جۇلدەنى ساراپقا سالادى.
ماروككولىقتار 17 جەلتوقساندا قولا مەدال ءۇشىن باسەكەدە حورۆاتيامەن كەزدەسەدى.
ەسكە سالا كەتەيىك، بۇدان بۇرىن ۋگو ءلوريستىڭ ءوز ەلىنىڭ رەكوردىن جاڭارتقانىن، ارگەنتينا قۇراماسىنىڭ فينالعا شىققانىن جازعان بولاتىنبىز.
سونداي-اق مەسسي الەم چەمپيوناتتارىندا ارگەنتينا قۇراماسىنىڭ ۇزدىك سۇرمەرگەنى اتاندى.
ۇزدىك ويىنشى مەسسي الەم چەمپيوناتتارىنىڭ رەكوردىن ورناتتى.