بۇل ويىندا دانيالىقتار فاۆوريت رەتىندە سانالعان ەدى
قاتاردا فۋتبولدان ءوتىپ جاتقان الەم چەمپيوناتىندا D توبىندا العاشقى بولىپ دانيا مەن تۋنيس قۇرامالارى سىنعا ءتۇستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل ويىندا دانيالىقتار فاۆوريت رەتىندە سانالعان ەدى.
دانيا قۇراماسى 1992 جىلى ەۋروپا چەمپيونى اتانسا، 1984 جانە 2020 جىلدارى قولا جۇلدەگە يە بولعان. ال الەم بىرىنشىلىگىندە دانيالىقتاردىڭ ونشا جولى بولا قويعان جوق.
2020 جىلعى ەۋروپا چەمپيوناتىندا فينليانديامەن ويىندا دانيالىق كريستيان ەريكسەننىڭ ەسىنەن تانىپ، قۇلاپ قالعانى بەلگىلى. دەگەنمەن سودان كەيىن ك.ەريكسەن ۇلكەن فۋتبولعا قايتا ورالدى.
الەم چەمپيوناتىنا التىنشى رەت جولداما العان تۋنيس ءوز توبىنان ەشقاشان شىعىپ كورمەگەن ەدى.
قوس قۇراما بۇعان دەيىن 2002 جىلى جولداستىق كەزدەسۋ وتكىزىپ، وندا ەۋروپالىقتار 2:1 ەسەبىمەن جەڭگەن بولاتىن.
بۇل جولى باستاپقىدا تۋنيستىكتەردىڭ باسىمدىعى بايقالعانىمەن، دانيالىقتار كوپ ۇزاماي-اق ەڭسە تۇزەدى.
ءبىرىنشى تايم سوڭىنا تامان يۋسسەف م'ساكنيدىڭ تاماشا پاسىنان كەيىن يسسام جەبالي دانيالىق قاقپاشى، 36 جاستاعى كاسپەر شمەيكەلمەن بەتپە-بەت شىققانىمەن، ايلاسىن اسىرا المادى.
ەكىنشى كەزەڭدە 69-مينۋتتا ك.ەريكسەننىڭ اسا ءقاۋىپتى سوققىسىن تۋنيستىك قاقپاشى ايمەن دامەن قايتاردى. ىلە-شالا ەكىنشى تايمدا الاڭعا شىققان اندرەاس كورنەليۋستىڭ باسپەن باعىتتاعان دوبى قاقپا جاقتاۋىنان كەرى قايتتى.
دانيالىقتار كوبىرەك ءقاۋىپ توندىرگەنىمەن، ەسەپ اقىرى اشىلعان جوق – 0:0.
وسىلايشا، تەڭ تارقاسقان كوماندالار بىر-بىردەن ۇپايعا يە بولدى.
D توبىندا بۇگىن سونىمەن قاتار فرانسيا – اۋستراليا قۇرامالارى جاسىل الاڭعا شىعادى.
ەسكە سالا كەتەيىك، بۇدان بۇرىن فۋتبولدان بيىلعى «التىن دوپ» يەگەرىنىڭ الەم چەمپيوناتىنان تىس قالعانىن جازعان بولاتىنبىز.
سونداي-اق كريشتيانۋ رونالدۋ فۋتبولدان الەم چەمپيوناتىنىڭ فاۆوريتتەرىن اتادى.
ارگەنتينا قۇراماسى الەم چەمپيوناتىندا ساۋد ارابياسىنان جەڭىلدى.