فرانسۋز ينۆەستورىنىڭ قۇقىعى قورعالدى

پروكۋراتۋرا ورگاندارى مەملەكەت باسشىسىنىڭ تاپسىرماسىنا سايكەس ماڭىزدى ينۆەستيسيالىق جوبالاردى سۇيەمەلدەۋ بويىنشا جۇمىستى جالعاستىرۋدا، دەپ حابارلايدى Almaty-akshamy.kz.

باس پروكۋراتۋرانىڭ باسپا ءسوز قىزمەتىنىڭ مالىمەتىنشە، پروبلەمالاردى ءتيىمدى شەشۋ، ينۆەستورلاردىڭ قۇقىقتارى مەن زاڭمەن قورعالاتىن مۇددەلەرىن قالپىنا كەلتىرۋ بولىپ تابىلاتىن باستى مىندەت قاداعالاۋ قىزمەتىنىڭ باسىم باعىتتارىنىڭ ءبىرى.

باس پروكۋراتۋرا مەن «Kazakh Invest» ۇك» اق (Task Force) بىرلەسكەن جۇمىسى شەڭبەرىندە 2018 جىلدان باستاپ پاۆلودار مۇناي-حيميا زاۋىتىندا سۋتەكتەردى ءوندىرۋ جونىندەگى جوبالاردى ىسكە اسىراتىن «Air Liquide» فرانسۋز ينۆەستورىنىڭ پروبلەماسى انىقتالدى.

اتالعان فرانسۋز كومپانياسى ونەركاسىپ، دەنساۋلىق ساقتاۋ جانە ەكولوگيا ءۇشىن گاز وندىرۋدە الەمدىك كوشباسشى بولىپ تابىلادى.  

پاۆلودار وبلىسىنىڭ سالىق ورگاندارى ينۆەستوردىڭ اتىنا 99،8 ملن تەڭگە سوماسىنا ققس جانە كەدەندىك باج تولەۋ تۋرالى حابارلامانى زاڭسىز ەنگىزگەن. ينۆەستورعا يمپورتتالاتىن تاۋاردىڭ جىكتەلۋىن دۇرىس انىقتاماعان.

پروكۋراتۋرانىڭ قاداعالاۋ اكتىسى بويىنشا 3 كۇن ىشىندە حابارلاما جويىلدى.

جول بەرىلگەن بۇزۋشىلىق ءۇشىن پاۆلودار وبلىسى مەملەكەتتىك كىرىستەر دەپارتامەنتىنىڭ لاۋازىمدى تۇلعاسى تارتىپتىك جاۋاپكەرشىلىككە تارتىلدى.

جالپى، بۇگىندە پروكۋرورلار ينۆەستورلاردىڭ 85 پروبلەمالىق كەيسىن شەشتى.

بۇل جۇمىس جالعاسۋدا جانە باس پروكۋراتۋرا باسشىلىعىنىڭ ەرەكشە باقىلاۋىندا.