فرانسيادا تۇرعىن ءۇي قۇلادى

بيلىك وقيعانىڭ سەبەبى مەن زارداپ شەككەندەر سانىن انىقتاۋدا.

فرانسيانىڭ وڭتۇستىگىندەگى مارسەل قالاسىنىڭ ورتالىعىندا تۇرعىن عيمارات وپىرىلىپ قۇلادى، دەپ مالىمدەدى جەكسەنبى، 9 ساۋىرگە قاراعان ءتۇنى قالا مەرى بەنۋا پاييان، دەپ حابارلايدى اlmaty-akshamy.kz قازاقپاراتقا سىلتەمە جاساپ.

وقيعا جەرگىلىكتى ۋاقىت بويىنشا شامامەن 00.40-تا بولدى - تيۆولي كوشەسىندەگى №17 ءۇي قيرادى، عيماراتپەن جاناسىپ تۇرعان ۇيلەر دە جارىم-جارتىلاي قۇلادى.

بيلىك وقيعانىڭ سەبەبى مەن زارداپ شەككەندەر سانىن انىقتاۋدا. جاقىن ماڭداعى تۇرعىندار ەۆاكۋاسيالاندى. كەم دەگەندە ەكى ادام جەڭىل جاراقات الدى، دەپ جازادى La Provence.

پاييان وقيعا ورنىنداعى ىزدەستىرۋ جۇمىستارىنا قيراندىلاردان شىققان ءورت كەدەرگى بولىپ وتىرعانىن اتاپ ءوتتى. ول سونداي-اق، ءۇيدىڭ وپىرىلىپ قۇلاۋىنا جارىلىس سەبەپ بولۋى مۇمكىن ەكەنىن ايتتى، ءبىراق ونىڭ شىعۋ تابيعاتى بەلگىسىز.

پروۆانس-الپى-كوكشىل جاعالاۋ ايماعىنىڭ پرەفەكتى كريستوف ميرمان دا فرانس پرەسس اگەنتتىگىنە بەرگەن تۇسىنىكتەمەسىندە قيراۋ گاز جارىلىسىنان بولۋى مۇمكىن ەكەنىن ايتتى.

كۋاگەرلەردىڭ ايتۋىنشا، قيراۋ الدىندا جارىلىس بولعان.

وقيعا مارسەلدە سوڭعى جىلدارداعى ەڭ ۇلكەن عيمارات قيراۋلارىنىڭ ءبىرى بولدى. 2018 جىلدىڭ قاراشاسىندا مارسەلدەگى ەكى عيماراتتىڭ قۇلاۋى سالدارىنان سەگىز ادام قازا تاپقان.