بۇل شارا قازان ايىندا پاريجدەگى يۋنەسكو شتاب-پاتەرىندە بولادى.
قازان ايىندا پاريجدەگى يۋنەسكو شتاب-پاتەرىندە ءانشىنىڭ 100 جىلدىعىنا ارنالعان مەرەيتويلىق كونسەرت وتەدى، دەپ حابارلايدى Almaty-akshamy.kz مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
«2022 جىلدىڭ 1 قاڭتارىندا اتى اڭىزعا اينالعان ءانشى روزا باعلانوۆا 100 جاسقا تولادى. قازاقستان مەن كسرو حالىق ءارتىسى، قازاقستاننىڭ حالىق باتىرى، ەكىنشى دۇنيەجۇزىلىك سوعىس مايداندارىندا جاۋىنگەرلەرگە كونسەرت قويعان. ول ءبىزدىڭ ەلىمىزدە جانە شەتەلدە انسۇيەر قاۋىم اراسىندا ءالى دە تانىمال. ونىڭ ەسىمىن ماڭگى ەستە ساقتاۋ ءۇشىن ءىس-شارالار قابىلداۋدى تاپسىرامىن»، - دەپ تاپسىرما بەرگەن ەدى مەملەكەت باسشىسى.
مادەنيەت مينيسترلىگىنىڭ حابارلاۋىنشا، روزا باعلانوۆانىڭ 100 جىلدىق مەرەيتويىن وتكىزۋ جونىندەگى جالپىرەسپۋبليكالىق جوسپار ازىرلەنگەن. وندا كونسەرتتەر، كورمەلەر، فيلمدەر كورسەتىلىمى سەكىلدى 2022 جىلعا جوسپارلانعان 41 ءىس-شارا بار.
«كۇنى كەشە عانا ماسكەۋدە فوتوكورمە ۇيىمداستىرىلىپ، مەرەكەلىك كونسەرت ءوتتى. قازان ايىندا پاريجدەگى يۋنەسكو شتاب-پاتەرىندە ءانشىنىڭ 100 جىلدىعىنا ارنالعان مەرەيتويلىق كونسەرت وتەدى»، - دەيدى مينيسترلىكتەن.