فرانسيادا جۇلدە العان قازاق كينوسى

بۇل تۋرالى ەرلان تولەۋتاي فەيسبۋك پاراقشاسىنا جازدى.

فرانسيانىڭ ۆەزۋل قالاسىندا وتكەن 31ء-شى حالىقارالىق ازيا كينوفەستيۆالىندە قازاقستاندىق رەجيسسەر ەلزات ەسكەندىر "ءابىل" ءفيلمى بىردەن ءۇش نەگىزگى نوميناسيا بويىنشا جەڭىسكە جەتىپ، فەستيۆالدىڭ باستى ماراپاتتارىنا يە بولدى، دەپ حابارلايدى aqshamnews.kz

قازىلار گران-پريى  (Jury Grand Prize)

كينوسىنشىلار جۇلدەسى (Critical Jury Prize)

NETPAC قازىلار جۇلدەسى (NETPAC Jury Prize)

"ءابىل" ءفيلمىنىڭ فەستيۆالدە قاتارىنان ءۇش باس نوميناسيانى جەڭىپ الۋى ونىڭ كوركەمدىك قۇندىلىعىن ايقىن كورسەتتى.

“ءبىر ايعا جۋىق مەرزىمگە سوزىلعان بۇل ساپارىمىز بىزگە وڭاي بولعان جوق. دەسەك تە ءبىز ەۋروپانىڭ ءتورى – شۆەسيا مەن دانيادان جانە فرانسيانىڭ كورىكتى جەرلەرىنەن، تاريحي ورىندارىنان شاما-شارقىمىز كەلگەنشە اقپارات تاراتا الدىق. سونداي-اق كونكۋرستان تىس قاتىسىپ، ەۋروپالىق پرەمەراسىن جاساعان شۆەسيانىڭ گەتوبورگ جانە نەگىزگى كونكۋرسىنا قاتىسىپ، ءۇش بىردەي بايگەسىن جەڭىپ العان فرانسيانىڭ ۆەزۋل حالىقارالىق فەستيۆالدەرىنەن جۇيەلى رەپورتاجدار جاساپ تۇردىق”- دەپ جازدى ەرلان تولەۋتاي.

سونداي-اق وسى فيلمگە قولداۋ كورسەتكەندەر وتانداستار مەن قانداستارعا دا العىس ءبىلدىردى.

“جالپى ءبىز وسى جولعى ساپارىمىزدا قاراپايىم ازاماتتاردىڭ مورالدىق قولداۋىن جان-تانىمىزبەن سەزىندىك. اسىرەسە شۆەسيا مەن دانيا جانە فرانسياداعى وتانداستارىمىز بەن قانداستارىمىز بىزگە شىن جۇرەكتەن تىلەكتەستىك ءبىلدىردى. سول ءۇشىن شەتەلدەگى قازاعىم – سىزدەرگە شەكسىز العىسىمىزدى بىلدىرەمىز!”- دەيدى ول.