گەرمانيانىڭ ماينداعى فرانكفۋرت قالاسىندا «Frankfurter Buchmesse-2024» فرانكفۋرت كىتاپ جارمەڭكەسى وتۋدە.
شاراعا 95 ەلدەن مىڭنان استام اۆتور قاتىسۋدا، دەپ حابارلايدى aqshamnews.kz.
ق ر مادەنيەت جانە اقپارات مينيسترلىگىنىڭ قولداۋىمەن قازاقستاندىق باسپاگەرلەر ءۇشىن ارنايى ستەند ۇيىمداستىرىلىپ، 250-دەن استام كىتاپ ۇسىنىلدى.
حالىقارالىق جارمەڭكەگە قوعام قايراتكەرلەرى، وتاندىق باسپاگەرلەر، اۋدارماشىلاردى قوسا العاندا 30-دان استام وتاندىق وكىل، سونداي-اق «مەكتەپ»، «الماتىكىتاپ»، «اتامۇرا»، «ARMAN-PV»، «Steppe & World Publishing»، «ASTANA-KITAP» سىندى ءىرى باسپالار قاتىسۋدا.
«قازاقستاننىڭ Frankfurter Buchmesse-2024 كىتاپ جارمەڭكەسىنە قاتىسۋى – ەلىمىز ءۇشىن ماڭىزدى تاريحي وقيعا. بۇل حالىقارالىق پلاتفورما بىزگە مادەني مۇرامىزدى تانىستىرىپ، قازاقستاندىق اۆتورلار مەن باسپاگەرلەردى الەمدىك دەڭگەيدە كورسەتۋگە مۇمكىندىك بەرەدى. جارمەڭكە اياسىندا تەك وتاندىق باسىلىمداردى تانىستىرىپ قانا قويماي، بولاشاقتا ستراتەگيالىق بايلانىستار ورناتۋ ءۇشىن ماڭىزدى كەزدەسۋلەر مەن كەلىسسوزدەر وتكىزۋدى جوسپارلادىق. بۇل باستاما ءبىزدىڭ كىتاپ نارىعىنىڭ دامۋىنا، ونىڭ جاڭا دەڭگەيگە شىعۋىنا جانە اۆتورلاردىڭ شىعارمالارىن الەم بويىنشا تاراتۋعا بىرەگەي مۇمكىندىك بەرەدى»، — دەدى قازاقستان رەسپۋبليكاسىنىڭ مادەنيەت جانە اقپارات مينيسترلىگى ارحيۆتەر، قۇجاتتاما جانە كىتاپ ءىسى كوميتەتىنىڭ ءتوراعاسى رۋستام الي.
Frankfurter Buchmesse اياسىندا كورمەدەن بولەك سەمينارلار، دوڭگەلەك ۇستەلدەر، كونسەرتتەر جانە باسقا دا مادەني ءىس-شارالار وتكىزىلەدى.
ايتا كەتەيىك، Frankfurter Buchmesse جىل سايىن وتكىزىلەتىن دۇنيەجۇزىلىك ەڭ ءىرى جارمەڭكە سانالادى. بيىل جارمەڭكە 16-20 قازان ارالىعىندا وتەدى.