بۇل تۋرالى ازاماتتىق اۆياسيا كوميتەتى مالىمدەدى.
قازاقستاندىق تاسىمالداۋشى اۋە رەيسى كەشىكتىرىلگەن كەزدە جولاۋشىلاردى قوناق ۇيگە ورنالاستىرماعان. اۋە وپەراتورى تاراپىنان جولاۋشىلار قۇقىعىن بۇزعان جالعىز بۇل جاعداي عانا ەمەس، دەپ حابارلايدى aqshamnews.kz 24.kz-كە سىلتەمە جاساپ.
جاقىندا 12 جاستاعى بالانى بورتقا كىرگىزبەي، دالادا قالدىرعانى تاعى بار. ءبىر جارىم اي بۇرىن ەگىز بالاسىن امەريكاعا ءتىل ۇيرەتۋ كۋرستارىنا جىبەرگەن ورالدىق جازيرا مۋسينا قىزدارىنىڭ ءبىرى ۇيگە قيىندىقپەن ورالعانىن حابارلادى. نيۋ-يورك-ستامبۋل، ستامبۋل-استانا باعىتتارى بويىنشا ساپار ءساتتى ورىندالىپ، 21 شىلدە كۇنى «فلاي ارىستان» اۋە كومپانياسىنىڭ ۇشاعىمەن استانادان ورالعا قايتاتىن كەزدە تەحنيكالىق اقاۋ شىعىپ، كامەلەت جاسقا تولماعان بالا بوتەن قالادا قاراۋسىز قالىپ قويادى. الايدا جولاۋشىنىڭ ۇشۋ بيلەتى مەن قۇجاتتارى تۇگەل بولعان.
جازيرا مۋسينا، ورال قالاسىنىڭ تۇرعىنى: - بالالار جەتەكشىسىمەن اۋە كومپانياسى وكىلىنە جۇگىنگەن ساتتە بارلىعىن تىركەپ، ۇشاققا وتىرۋ تالونىن بەرەدى دە، مەنىڭ قىزىمدى كەيىنىرەك تىركەپ، بورتقا ءوزىمىز الىپ كەلەمىز، تەحنيكالىق اقاۋ ورىن الدى دەپ قالدىرعان. الايدا قىزىم ماعان تەلەفون سوعىپ، ۇشاققا وتىرعىزباي جاتقانىن ايتادى. سوسىن جەتەكشىسىنە حابارلاستىم. وعان دا قىزمەتكەرلەر زەرە ۇشاقتا بولادى دەپ ايتقان ەكەن. ءبىراق ولار ۇشاققا وتىرعاندا قىزىم بولماعان. ءسويتىپ جەتەكشىسى جاعدايدى انىقتاماق بولعاندا ۇشاقتىڭ ەسىگى جابىلىپ، وعان شىعۋعا تىيىم سالىنعان. وسىلايشا ولار ۇشىپ كەتەدى دە، قىزىم اۋەجايدا جالعىز قالىپ، تىركەۋ ورنى الدىندا 3 ساعات بويى جىلاعان.
مۇنداي جاعدايعا قاتتى نارازى بولعان انا اۋە كومپانياسىنا جانە باسقا دا بىرنەشە وكىلەتتى ورىنعا شاعىم تۇسىرگەن. الايدا ەش جاۋاپ بولماعان سوڭ، بۇل جاعدايدى كوپتىڭ نازارىنا شىعاردى. ءقازىر ەندى وقيعا ەلگە ءمالىم بولىپ، شۋعا اينالعان سوڭ اۋە كومپانياسى كەشىرىم سۇراپ، ءتىپتى 4 ملن تەڭگە كولەمىندە وتەماقى ۇسىندى دەيدى جازيرا مۋسينا.
جازيرا مۋسينا، ورال قالاسىنىڭ تۇرعىنى: - اۋە كومپانياسىنىڭ 21 شىلدەدەن بەرى بىزدەن كەشىرىم سۇراپ، جاعدايعا تۇسىنىكتەمە بەرەتىندەي ۋاقىتى بولدى عوي! ولار نەگە ءدال ءقازىر جاعداي ۋشىققان كەزدە ماعان حابارلاسىپ تۇر؟ مەندە قارجىلاي پايدا كورۋ دەگەن وي اتىمەن بولمادى. مەنى تەك بالامنىڭ قورعانسىز قالعانى قينادى. الداعى ۋاقىتتا مۇنداي جاعداي قايتالانباسا ەكەن دەيمىن. 12 جاستاعى بالانى جالعىز قالدىرۋ ۇلكەن قاتەلىك بولدى. كامەلەت جاسقا تولماعان بالانىڭ قۇقى اياققا تاپتالماۋى كەرەك!
ءيا، 12 جاستاعى بالا زارداپ شەككەن وقىس جاعدايعا قاتىستى وقۋ-اعارتۋ مينيسترلىگى بالالار قۇقىتارىن قورعاۋ كوميتەتى دە پىكىر ءبىلدىردى.
ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى: بالا قۇقىقتارىنىڭ ساقتالۋىن بۇزاتىن وسى سىندى جاعدايلارعا جول بەرۋگە بولمايدى. بۇل جاعداي بالانىڭ قاۋىپسىزدىگى مەن قۇقىقتارىنىڭ بۇزىلۋىنىڭ كورىنىسى بولىپ تابىلادى. بالالاردىڭ قاۋىپسىزدىگى مەن ءال-اۋقاتى بارلىق جاندار ءۇشىن باسىمدىق بولۋى ءتيىس. ءبىرىنشى كەزەكتە اۆياكومپانيا رەيسكە تىركەلگەن بالالارعا قامقورلىق جاساۋى كەرەك ەدى.
اۋە كومپانياسىنىڭ بالانى اۋەجايدا قالدىرىپ كەتۋى ۇلكەن ولقىلىق دەپ وتىر قازاقستان ازاماتتىق اۆياسيا كوميتەتى. سەبەبى قانداي تەحنيكالىق اقاۋ ورىن الماسىن، جولاۋشىنىڭ قۇقىعى بۇزىلماۋى كەرەك دەيدى.
دارحان قاتىشيەۆ، ق ر كولىك مينيسترلىگى ازاماتتىق اۆياسيا كوميتەتى ءتوراعاسىنىڭ ورىنباسارى: - الدىن الا تىركەلگەن، بيلەت بولعان ادامدى مىندەتتى تۇردە ۇشاققا وتىرعىزۋ كەرەك. ەندى ءوز تاراپىمنان ءقازىر ءبىز تەكسەرىس جۇرگىزەيىك دەپ جاتىرمىز. تەكسەرىسكە ءوزىمىز جانە قازاقستان اۆياسيا اكىمشىلىگى قىزمەتكەرلەرى دە قاتىسادى. جان-جاقتى تەكسەرىس وتكىزىلەدى. سول تەكسەرىس ناتيجەسى بويىنشا بۇكىل شارالار قابىلدانادى.
سونىمەن قاتار اكىمشىلىك جاۋاپكەرشىلىككە تارتامىز. ازاماتتىق اۆياسيا كوميتەتى وكىلىنىڭ ايتۋىنشا، وسى شىلدە ايىنىڭ وزىندە «فلاي ارىستان» اۋە كومپانياسى 3 رەت اكىمشىلىك جاۋاپقا تارتىلعان. الايدا مىنا جاعداي قاتاڭ تەرگەۋ مەن تەكسەرىستى تالاپ ەتەدى.