كاسىپكەرلىك سۋبەكتىلەرىندە ءارتۇرلى قوسىمشالار ارقىلى ساتىپ الۋدى جۇزەگە اسىرعان كەزدە باقىلاۋ-كاسسا ماشيناسىنىڭ چەگىن قولدانۋ، فيسكالدى چەك بەرۋ مىندەتتى، دەپ حابارلايدى مەملەكەتتىك كىرىستەر كوميتەتى.
«تولەمدەر جانە تولەم جۇيەلەرى تۋرالى» زاڭعا سايكەس، قولما-قول اقشاسىز تولەمدەر نەمەسە اقشا اۋدارىمدارى بانكتىك شوتتاردى پايدالانا وتىرىپ، تولەم قۇرالدارىنىڭ نەگىزىندە، سونداي-اق تەڭگەنى جانە شەتەل ۆاليۋتاسىن پايدالانباستان دا جۇزەگە اسىرىلادى. مۇنداعى تولەم قۇرالى دەگەنىمىز - تولەم قۇجاتى نەمەسە ەلەكتروندىق تولەم قۇرالى، ونى پايدالانىپ تولەم نەمەسە اقشا اۋدارىمى جاسالادى. سايكەسىنشە، بانكتىك شوتتان بانكتىك شوتقا اۋدارۋ ارقىلى قولما-قول اقشاسىز نىساندا ەسەپ ايىرىسۋ جۇزەگە اسىرىلعان جاعدايدا، باقىلاۋ-كاسسا ماشيناسىنىڭ چەگىن قولدانۋ مىندەتتى ەمەس»، - دەپ جازدى ۆەدومستۆودان.
ايتا كەتەيىك، باقىلاۋ-كاسسا ماشيناسىنىڭ چەگى - ساتۋشى مەن ساتىپ الۋشى اراسىندا اقشالاي ەسەپ ايىرىسۋدى جۇزەگە اسىرۋ دەرەگىن راستايتىن باستاپقى ەسەپكە الۋ قۇجاتى. چەك قاعاز نەمەسە ەلەكتروندى تۇردە بەرىلەدى. ال فيسكالدى چەك - ساپاسىز تاۋارلاردى العان جاعدايدا ساتىپ الۋشىنىڭ قۇقىعىن قورعاۋدىڭ، سونداي-اق تولەنگەن سومانىڭ ءبىر بولىگى سالىق تۇرىندە بيۋدجەتكە تۇسەتىنىنىڭ كەپىلى.