ماتەريالدىق شىعىن 20 ميلليون تەڭگەنى قۇرادى.
الماتى پوليسەيلەرى جالعان قۇجاتتار ارقىلى فيرمالاردان ءىرى كولەمدەگى اقشانى جىمقىرىپ كەلدى دەگەن كۇدىكپەن ەر ازاماتتى ۇستادى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى دەرەك بويىنشا، جەدەل ىزدەستىرۋ ءىس-شارالارى بارىسىندا پوليسيا قىزمەتكەرلەرى 30 جاستاعى س.ەسىمدى ازاماتتى ۇستادى. ول ءبىرقاتار الاياقتىق ارەكەتتەر جاسادى دەگەن كۇدىككە ءىلىندى. قازىرگى ۋاقىتتا ءۇش قىلمىستىق ءىس ءبىر وندىرىسكە بىرىكتىرىلىپ، ق ر قك-نىڭ 190-بابى 2-بولىگى، 4-تارماعى بويىنشا تەرگەلۋدە.
«س.ەسىمدى ازامات قالاداعى ءارتۇرلى فيرمالاردىڭ قويمالارىنا “جەتكىزۋشى” بولىپ جۇمىسقا ورنالاستى. ءبىراز ۋاقىتتان سوڭ، فيرما قىزمەتكەرلەرىنىڭ سەنىمىنە كىرىپ العاننان كەيىن، قويمادان تاۋارلاردى شىعارۋ ءۇشىن قۇجاتتاردى قولدان جاسادى. تاۋاردى العاننان كەيىن ول بەلگىسىز باعىتتا جاسىرىنىپ، سودان كەيىن ينتەرنەت الاڭدار ارقىلى قىلمىستىق جولمەن الىنعاندى نارىقتىق باعادان تومەن باعامەن ساتتى. جالپى ماتەريالدىق شىعىن 20 ميلليون تەڭگەنى قۇرادى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
جىگىتتىڭ بۇل الداۋ تىزبەگىن ءوزى ويلاپ تاپقانى جانە جالعىز ارەكەت ەتكەنى انىقتالدى. قازىرگى ۋاقىتتا كۇدىكتى ۋاقىتشا ۇستاۋ يزولياتورىندا. تەرگەۋ شارالارى جۇرگىزىلۋدە.
