فەرمەرلەر اراسىندا «بەلارۋس» تراكتورى ۇلكەن سۇرانىسقا يە ەكەن

قازاقستاندا فەرمەلەر اراسىندا وتاندىق تراكتورلارعا سۇرانىس ارتىپ كەلەدى. بۇل تۋرالى اۋىل شارۋاشىلىعى ءبىرىنشى ۆيسە-مينيسترى ايداربەك ساپاروۆ ايتتى، دەپ حابارلايدى اlmaty-akshamy.kz

«2022 جىلدىڭ باسىنداعى مالىمەت بويىنشا، ەلىمىزدە 147 مىڭ تراكتور، 38 مىڭ كومباين، 4 743 تۇقىم سەبۋ كەشەنى جانە 77 مىڭ دانسەپكىش بار. بۇل رەتتە تراكتورلاردىڭ 80 پايىزى، كومبايننىڭ 72 پايىزىنىڭ قىزمەت ەتۋ مەرزىمى 15 جىلدان اسقان. بارلىق پاركتىڭ ورتاشا توزۋى دەڭگەيى - 76 پايىز»، - دەدى ا. ساپاروۆ سەناتتاعى دوڭگەلەك ۇستەل وتىرىسىندا.

سونىمەن قاتار ول اۋىل شارۋاشىلىعى تەحنيكاسىن جاڭارتۋ كورسەتكىشىنە توقتالا كەلە، 2017 جىلى 103 ملرد تەڭگەگە 8،5 مىڭ تەحنيكا، ال 2021 جىلى 260 ملرد تەڭگەگە 17 مىڭ تەحنيكا ساتىپ الىنعانىن جەتكىزدى.

ۆيسە-مينيستردىڭ ايتۋىنشا، وتاندىق ماشينا جاساۋ دەڭگەيى ءوسىپ كەلەدى.

«قازاگروقارجى» مالىمەتىنە قاراعاندا، 2021 جىلى وتاندىق اۋىل شارۋاشىلىعى تەحنيكاسىن ساتىپ الۋ ۇلەسى جالپى دەڭگەيدە كومبايىندار بويىنشا 79 پايىزعا دەيىن، تراكتورلارعا قاتىستى 62 پايىزعا دەيىن ءوستى. تراكتورلاردىڭ كەيبىر مودەلدەرىنە سۇرانىس وندىرىستەن ارتىق بولدى. ەلىمىزدە قۇراستىرىلاتىن «كيروۆەس»، «ۆەرساتايل»، «بەلارۋس» تراكتورلارى فەرمەرلەر اراسىندا ۇلكەن سۇرانىسقا يە»، - دەدى ايداربەك ساپاروۆ.