ەۋروپانى ىندەت قىسىپ بارادى

ەۋروپادا كوروناۆيرۋس رەكوردى كۇن وتكەن سايىن جاڭارىپ جاتىر

ەۋروپالىق وداق ەلدەرىندە كوروناۆيرۋس رەكوردى جاڭارىپ جاتىر. فرانسيادا سوڭعى تاۋلىكتە 208 مىڭ ۆيرۋس جۇقتىرۋ جاعدايى تىركەلدى، ساراپشىلار قاڭتاردىڭ باسىندا بۇل كورسەتكىش 250 مىڭعا دەيىن وسەدى دەپ قورقادى، دەپ حابارلايدى Almaty-akshamy.kz

سونىمەن قاتار دانيا مەن پورتۋگاليادا جۇقتىرۋ جاعدايلارى كۇرت كوبەيدى، دەپ حابارلايدى قازاقپارات Euronews اگەنتتىگىنە سىلتەمە جاساپ.

دۇنيەجۇزىلىك دەنساۋلىق ساقتاۋ ۇيىمى كەلەسى جىلدىڭ ورتاسىنا دەيىن الەم ەلدەرىنىڭ 70%-ىن ۆاكسينامەن قامتۋ ءۇشىن كۇش سالۋدا. وعان ۇيىمنىڭ باس ديرەكتورى تەدروس ادان گەبرەيەسۋس شاقىرادى.

"وميكروننىڭ" جۇقپالىراق ەكەنىنە قاراماستان، "دەلتامەن" بىرگە تارالىپ جاتقاندىعى الاڭداتادى. سالدارىنان مەديسينا قىزمەتكەرلەرى مەن دەنساۋلىق ساقتاۋ جۇيەلەرىنە ۇلكەن سالماق تۇسۋدە»، - دەدى ول.

گەرمانيانىڭ دەنساۋلىق ساقتاۋ ءمينيسترى كارل لۋتەرباحتىڭ ايتۋىنشا، قازىرگى كەزدە جۇقتىرۋ جاعدايلارىنىڭ بارلىعى انىقتالىپ جاتقان جوق، نەگىزىندە ۆيرۋس جۇقتىرعاندار سانى دەرەكتەردەگى كورسەتكىشتەردەن ەداۋىر كوپ.

«شىن مانىندە جۇقتىرۋ جاعدايلارى ەكى نەمەسە ءۇش ەسە كوپ. سونىمەن قاتار ۆيرۋستىڭ "وميكرون" شتامىن جۇقتىرۋ جاعدايلارى ارتۋدا، بۇل دا قاتتى الاڭداتادى»، - دەدى مينيستر.

گرەكيادا قاڭتارعا جوسپارلانعان جاڭا شارالار ۋاقىتىنان ەرتە ەنگىزىلىپ جاتىر، سەبەبى سەيسەنبى كۇنى ەلدە 21 مىڭ جۇقتىرۋ جاعدايى تىركەلەگەن. بۇل ءبىر كۇن بۇرىنعى كورسەتكىشتەن ەكى ەسە كوپ.

يسپانيادا دا ۆيرۋس جۇقتىرعاندار قاتارى كۇرت كوبەيدى، ءبىر تاۋلىكتە 100 مىڭ ادام ۆيرۋس جۇقتىرعان. الايدا ەل بيلىگى جۇمىسشىلار تاپشىلىعىن بولدىرماۋ ماقساتىندا وقشاۋلاۋ ۋاقىتىن ون كۇننەن جەتى كۇنگە ازايتقان.