اڭگىمە ەڭ الدىمەن بالانىڭ ءوسۋىن تەجەيتىن، جۇيكە، تىنىس الۋ جانە يممۋن جۇيەسىن بۇزاتىن حيميكاتتار جونىندە بولىپ وتىر. بالالار وينايتىن زاتتاردىڭ قۇرامىنداعى كەيبىر حيميالىق زاتتار ادامنىڭ ۇرپاق ءوربىتۋ (fertilis) قابىلەتىنە زيان.
جاڭا ەرەجە بويىنشا ەڭ الدىمەن ويىنشىق جاساعاندا قولدانۋعا تىيىم سالىناتىن حيميالىق زاتتار: PFAS جانە CMR توبى.
PFAS دەگەنىمىز – سينتەتيكالى فتورورگانيكا قوسىلىستارىنىڭ توبى. ولاردى بالالار ۇستامايتىن زاتتاردا عانا قولدانۋ كەرەك.
ال CMR توبىنداعى حيميكاتتىڭ قۇرامىندا كانسەروگەن (قاتەرلى ىسىك تۋعىزاتىن)، مۋتاگەندى جانە جىنىستىق جۇيە ءۇشىن ۋلى زاتتار بار.
ساراپشىلاردىڭ پىكىرىنشە، بۇل حيميكاتتار بالانىڭ ءوسۋىن، گورمون جۇيەسى مەن كوگنيتيۆتى دامۋىن بۇزادى، ەسەيگەن كەزدە ۇرىق ساپاسىن تومەندەتەدى.
بۇل شەشىم ينتەرنەت ارقىلى ساتىلاتىن ونىمدەرگە دە تىيىم سالادى. بالا ءومىرىنىڭ قاۋىپسىزدىگىنە قاتىستى ەرەجە ەۋروپارلامەنت پەن ەو ەلدەرى ۇكىمەتتەرى ماقۇلداعان سوڭ كۇشىنە ەنەدى.
«ەو-نىڭ ويىنشىقتار قاۋىپسىزدىگى تۋرالى ەرەجەسى – الەمدەگى ەڭ قاتال ەرەجە، ءبىراق ءبىز قاۋىپ-قاتەردىڭ الدىن الۋعا ءتيىسپىز»، – دەدى پولشانىڭ دامۋ جانە تەحنولوگيا ءمينيسترى كشيشتوف پاشيك.
ءبىزدىڭ بازارلار مەن دۇكەندەردە ساتىلىپ جاتقان ويىنشىقتاردىڭ حيميالىق قۇرامى تەكسەرىلە مە ەكەن؟