كينوفەستيۆالگە سوڭعى ەكى جىلدا تۇسىرىلگەن 15 ۇزدىك وتاندىق فيلم كىردى
12-18 جەلتوقسان ارالىعىندا الماتىدا XVI حالىقارالىق «ەۋرازيا» كينوفەستيۆالى وتەدى، دەپ حابارلايدى Almaty-akshamy.kz.
بيىل ۇلتتىق كينونى قولداۋ مەملەكەتتىك ورتالىعى فەستيۆال سەرىكتەستەرىنىڭ قاتارىندا بار ورتالىق كومەگىمەن تۇسىرىلگەن 11 فيلم «ەۋرازيا» جۇمىسىنا قاتىسادى.
كينوفەستيۆالدىڭ پرەزيدەنتى - بەلگىلى رەجيسسەر، قازاقستاننىڭ ەڭبەك سىڭىرگەن قايراتكەرى ارداق ءامىرقۇلوۆ.
«پاندەميا كەزىندە كوپتەگەن مادەني شارالار توقتادى، فەستيۆالدەر، كونسەرتتەر، كينوتەاترلار جابىلعانى بارشاعا ءمالىم. بۇگىنگى تاڭدا جاعداي وزگەردى جانە ەكى جىلدىق ۇزىلىستەن كەيىن ءبىز «ەۋرازيا» كينوفەستيۆالىن قايتا جانداندىرامىز. فەستيۆال ءوزىنىڭ 1998 جىلى نەگىزى قالانىپ، الدىڭعى فەستيۆالدەردىڭ كوپشىلىگى وتكەن الماتىعا قايتا ورالادى»، - دەدى ول.
فەستيۆال مادەنيەت جانە سپورت مينيسترلىگىنىڭ تاپسىرىسىمەن ۇلتتىق كينونى قولداۋ مەملەكەتتىك ورتالىعى كومەگىمەن تۇسىرىلگەن ءسابيت قۇرمانبەكوۆتىڭ «بوران» ءفيلمىنىڭ الەمدىك پرەمەراسىمەن اشىلادى. كارتينا حالىقارالىق بايقاۋعا قاتىسادى، وندا ودان بولەك 14 فيلم باسەكەگە تۇسەدى. ولاردىڭ ىشىندە فرانسيا، چەحيا، تۇركيا، ۋكراينا، گرۋزيا، رەسەي، يران، ازەربايجان، قىرعىزستان، وزبەكستان، جۇڭگو كارتينالارى جانە كينوورتالىقتىڭ كومەگىمەن تۇسىرىلگەن تاعى ءبىر وتاندىق تۋىندى – «اعايىندىلار» ءفيلمى بار. جاس رەجيسسەر دارحان تولەگەنوۆتىڭ ءفيلمى جاقىندا گەرمانياداعى Oldenburg International Film Festival بەدەلدى كينوفەستيۆالىندە قازىلار القاسىنىڭ ارنايى سىيلىعىن العان بولاتىن.
«ەۋرازيادا» حالىقارالىقتان بولەك، كونكۋرستىق باعدارلاما – ۇلتتىق بايقاۋ بولادى، وعان سوڭعى ەكى جىلدا تۇسىرىلگەن 15 ۇزدىك وتاندىق فيلم كىردى.
ۇلتتىق بايقاۋدا توكيو كينوفەستيۆالىندە رەجيسسۋرا ءۇشىن سىيلىق العان دارەجان ومىربايەۆتىڭ «اقىن» كارتيناسى، بەرلينالە-2022 Generation سەكسياسىندا باس جۇلدە جەڭگەن فارحات ءشارىپوۆتىڭ «سحەما» اتتى كينوسى جانە كوپتەگەن حالىقارالىق كينوفەستيۆالدەردە كوزگە تۇسكەن ايجان قاسىمبەكتىڭ «وت» ءفيلمى سەكىلدى حيتتار ۇسىنىلعان. سونداي-اق، مۇندا كينوورتالىقتىڭ ەڭ تابىستى تۋىندىسى ايدىن ساحاماننىڭ «دوس-مۇقاسان» ءفيلمى، بيىل قازاقستاننان «وسكار» سىيلىعىنا ۇسىنىلعان ەمير ءبايعازيننىڭ «ءومىر» ءفيلمى، الديار بايراقىموۆتىڭ «پاراليمپياداشىسى» جانە ازيز زايروۆتىڭ «ماما، مەن ءتىرىمىن» كارتينالارى كورسەتىلەدى. سونىمەن قاتار، بۇل بايقاۋدا سەرىك اپرىموۆتىڭ «اۋىل» ءفيلمىنىڭ الەمدىك پرەمەراسى كۇتىلۋدە.
كونكۋرستان تىس «ەرەكشە وقيعا» باعدارلاماسىنىڭ كورسەتىلىمدەرى بولادى، وندا ءارتۇرلى داۋىرلەر مەن جانرلارداعى الەمدىك كينو قايراتكەرلەرىنىڭ، سونىڭ ىشىندە مەرەيتويلىق فيلمدەردىڭ رەتروسپەكتيۆالارى ۇسىنىلادى. سونىمەن بىرگە، قازىرگى زامانعى قازاقستاندىق قىسقامەتراجدى كينوعا ارنالعان «جاڭا ەسىمدەردى اشۋ» باعدارلاماسى بار. ول جەردە 2020-2022 جىلدارى تۇسىرىلگەن جاس رەجيسسەرلەردىڭ ۇزدىك 15 ءفيلمىنىڭ كورسەتىلىمدەرى بولادى. بۇل باعدارلامادا كينوورتالىقتىڭ تاعى ءبىر جۇمىسى بار، ول - ارۋان انارتايەۆتىڭ «ىستىق كول» قىسقامەتراجدى كارتيناسى.
«فەستيۆال قۇرىلعان ساتتەن «ەۋرازيا» داستۇرىندە وسكەن قازاقستاندىق كينەماتوگرافيستەردىڭ تۇتاس بۋىنى قالىپتاستى. بۇگىندە قازاقستاندىق كينەماتوگرافيا جوعارعى دەڭگەيگە جەتتى، سول ءۇشىن دە وعان جەكە ۇلتتىق بايقاۋ ءبولىنىپ وتىر. وندا حالىقارالىق كينوفەستيۆالدەرگە قاتىسىپ، جەڭىسكە جەتكەن فيلمدەر جانە كەڭ اۋديتوريا اراسىندا تابىسقا كەنەلگەن كارتينالار دا جارىساتىن بولادى»، - دەپ اتاپ ءوتتى فەستيۆالدىڭ باعدارلامالىق ديرەكتورى، قازاقستان كينوسىنشىلار قاۋىمداستىعىنىڭ پرەزيدەنتى گۇلنارا ابىكەيەۆا.
فەستيۆالدىڭ باسقا ءىس-شارالارىنان ءوندىرىس ساتىسىندا تۇرعان وتاندىق تۋىندىلاردى ۇسىناتىن Work-In-Progress باعدارلاماسىن ءبولىپ كورسەتۋگە بولادى. بۇل، اسىرەسە پروديۋسەرلەر مەن كينوفەستيۆال تاڭداۋشىلارى ءۇشىن قىزىقتى بولادى. سونىمەن بىرگە، كينويندۋستريا شەبەرلەرىمەن شەبەرلىك سىنىپتارى مەن ترەنينگتەر وتەدى. قازىلار القاسىنىڭ مۇشەلەرىمەن، فەستيۆالدىڭ شەتەلدىك جانە قازاقستاندىق قاتىسۋشىلارىمەن دوڭگەلەك ۇستەلدەر مەن باسپا ءسوز كونفەرەنسيالارىن دا وتكىزۋ جوسپارلانعان.
فەستيۆالدىڭ رەسمي اشىلۋ مەن جابىلۋ سالتاناتى اباي اتىنداعى قازاق ۇلتتىق وپەرا جانە بالەت تەاترىندا، كينو كورسەتىلىمدەرى Kinopark 16 كينوتەاترىندا (Forum ساۋدا-ويىن-ساۋىق ورتالىعى) وتەدى.