الماتىدا مەكتەپ جانىنداعى لاگەرلەردە بالالاردىڭ جازعى دەمالىسىن ۇيىمداستىرۋ جونىندە باسپا ءسوز تۋرى ءوتتى. وعان قالا اكىمىنىڭ ورىنباسارى اسەم ءنۇسىپوۆا، ءبىلىم باسقارماسىنىڭ باسشىسى ءلاززات جىلقىبايەۆا، سونداي-اق قالالىق ءماسليحات دەپۋتاتتارى مەن قوعامدىق كەڭەس مۇشەلەرى قاتىستى، دەپ حابارلايدى almaty-akshamy.kz
مونيتورينگ بارىسىندا قاتىسۋشىلار ءۇش مەكتەپتىڭ جانىنداعى لاگەر، الماتى تەحنولوگيالىق كوللەدجى بازاسىنداعى لاگەر جانە الاتاۋ اۋدانى وقۋشىلارىنىڭ يننوۆاسيالىق شىعارماشىلىق ورتالىعى باعدارلاماسىمەن تانىستى.
العاشقى نىسان بيىل العاش رەت ەتنيكالىق لاگەر اشقان №57 جالپى ءبىلىم بەرەتىن مەكتەپ بولدى. مەكتەپ اۋماعىندا ءىشى داستۇرگە ساي بەزەندىرىلگەن كيىز ۇيلەر ورناتىلعان. وندا وقۋشىلار ءۇشىن ۇلتتىق ويىندار، بايقاۋلار مەن ۆيكتورينالار ۇيىمداستىرىلادى. بالالار باۋىرساق، قۇرت ءپىسىرىپ دومبىرا شەرتىپ، ساندىك-قولدانبالى ونەرمەن اينالىسۋدى ۇيرەنەدى. مۇنىڭ ءبارى بالالاردى، اسىرەسە ۇلتتىق سالت-داستۇرلەردى، قازاقى قۇندىلىقتاردى، مادەنيەت پەن ادەت-عۇرىپتى تولىق ءسىڭىرۋ ءۇشىن ۇيىمداستىرىلعان.
«بيىل جازعى دەمالىستا 266 مىڭ بالا قامتىلادى. باسىمدىق كوپبالالى جانە از قامتىلعان وتباسىلاردان شىققان بالالارعا، اتا-اناسىز قالعان بالالارعا بەرىلەدى. بۇل جولى ءبىز بالالارعا ارنالعان ەتنولاگەرلەر مەن سپورت كەشەندەرىن ۇيىمداستىردىق. ءبىزدىڭ ماقسات - بالالاردى مادەنيەت پەن سپورتقا باۋلۋ. دەمالىس پايدالى، فۋنكسيونالدى ءارى بالالاردىڭ دامۋىنا باعىتتالعان. مەكتەپ جانىنداعى بارلىق لاگەردە تەگىن ىستىق تاماق ۇيىمداستىرىلعان»، - دەدى الماتى اكىمىنىڭ ورىنباسارى اسەم ءنۇسىپوۆا.
كەلەسى نىسان №63 مەكتەپتىڭ جانىنداعى سپورت لاگەر، وندا جۋرناليستەرگە دەمالىستىڭ قالاي ۇيىمداستىرىلعانى كورسەتىلدى. تالىمگەرلەر كۇن سايىن بالالاردى زياتكەرلىك جانە شىعارماشىلىق ويىندارعا ۇيرەتەدى، سپورتتىق بايقاۋلار مەن ۆيكتورينالار ۇيىمداستىرادى. قالادا بارلىعى وسىنداي 16 لاگەر اشىلعان.
بۇدان كەيىن باسپا ءسوز تۋرىنا قاتىسۋشىلار اۋەزوۆ اۋدانىنداعى الماتى تەحنولوگيالىق كوللەدجى بازاسىنداعى جازعى لاگەردىڭ جۇمىسىمەن تانىستى. مۇندا دەمالىس جانە كاسىبي باعدار سىندى پايدالى نارسەنى بىرىكتىرە بىلگەن. بۇل «جاز – بولاشاق ماماندىقپەن» جوباسىنىڭ ارقاسىندا جۇزەگە اسقان.
باسپا ءسوز تۋرى اياسىندا قاتىسۋشىلارعا 8 سىنىپ وقۋشىلارى يتالياندىق ماكارون دايىنداۋدى ۇيرەنىپ جاتقان اس ءۇي كورسەتىلدى. جالپى، مۇندا مەكتەپ وقۋشىلارى اسپازدىق، كونديتەرلىك، ناۋبايحانا بويىنشا شەبەرلىك دارىستەرىنەن ءوتىپ، باريستا جانە داياشى رەتىندە كليەنتتەرگە قىزمەت كورسەتۋدى ۇيرەنەدى.
«لاگەردەگى كونديتەرلىك كۋرسقا قاتىسامىن، كەكس ءپىسىرۋدى ۇيرەنىپ الدىم، رەسەپتىن بىلەمىن. بۇل جەردە قىسقا مەرزىمدە رەسەپتپە تانىسىپ، اس ازىرلەپ، قاتەلەسكەن جەرىمدى ءتۇسىندىم. ادەتتە مۇنداي شەبەرلىك ءدارىس اقىلى، ال مۇندا تەگىن ۇيرەنۋگە بولادى، ءونىم بىزگە بەرىلەدى»، - دەدى №147 مەكتەپتىڭ 8-سىنىپ وقۋشىسى ايشا حاميت قىزى.
باسپا ءسوز تۋرى سوڭىندا قاتىسۋشىلار الاتاۋ اۋدانى وقۋشىلارىنىڭ يننوۆاسيالىق شىعارماشىلىق ورتالىعىنا ات باسىن بۇردى. بالالار ءۇشىن ارنايى باعدارلاما ازىرلەندى: جازعى ۋاقىتتا وقۋ ساباقتارى ويىن تۇرىندە وتكىزىلەدى. بۇل بالالاردى قىزىقتىرۋ ءۇشىن قولعا الىنعان. لاگەردە بالالار يزوستۋديا، ۆوكالدىق-ەسترادالىق ۇيىرمە، سپورت سەكسيالارى، روبوتوتەحنيكا، اۆيامودەلدەۋ، سۋرەت سالۋ، موبيلوگرافيا جانە بي سياقتى ساباقتارعا قاتىسا الادى.
ەرەكشە قاجەتتىلىگى بار بالالارعا باسا نازار اۋدارىلادى. ولار ءۇشىن ۇساق موتوريكانى دامىتۋعا باعىتتالعان سەكسيالار قاراستىرىلعان.
«قوعامدىق كەڭەس جانىنداعى الەۋمەتتىك كوميسسيا مۇشەلەرى قالانىڭ مەكتەپ جانىنداعى لاگەرلەرىنىڭ رەيتينگىسىن شىعارادى. لاگەرلەر ورنالاستىرۋ شارتى، تاماقتانۋدى ۇيىمداستىرۋ، قاۋىپسىزدىك پەن ينكليۋزيۆتىلىكتى قامتاماسىز ەتۋ، ينفراقۇرىلىمنىڭ جاي-كۇيى جانە ت.ب. كريتەريي بويىنشا باعالاندى. جالپى، قالاداعى مەكتەپ جانىنداعى لاگەرلەردىڭ جۇمىسى جاقسى ۇيىمداستىرىلعانىن، بالالاردىڭ بوس ۋاقىتىن ءتيىمدى وتكىزۋ مۇمكىندىگى جان-جاقتى قاراستىرىلعان»، - دەدى الماتى قوعامدىق كەڭەسىنىڭ مۇشەسى رافاەل گاسانوۆ.
