الماتىلىق سۋرەتشى-يلليۋستراتوردىڭ ەڭبەكتەرى الەۋمەتتىك جەلىدە مىڭداعان قارالىم جيناپ، ءتىپتى شەتەلدىكتەردىڭ نازارىن اۋداردى، دەپ حابارلايدى aqshamnews.kz 24KZ-كە سىلتەمە جاساپ.
ماريا يلنيسكايا ەتنو-شيك ستيلىندە جۇمىس ىستەيدى، ۇلتتىق مادەنيەتتى زاماناۋي باعىتپەن ۇيلەستىرەدى. سوڭعى جۇمىستارىنىڭ ءبىرى – №2 وقۋشىلار ءۇيىنىڭ قابىرعاسىنداعى «ءبىلىم» مۋرالى. بۇل تۋىندىنى جەرگىلىكتى جۇرت جىلى قابىلدادى. اشىق، قانىق تۇستەرگە باي، كوڭىلگە قۋانىش ۇيالاتادى.
ونەرسۇيەر قاۋىم ماريا يلنيسكايانىڭ جۇمىستارىن ءدال وسىلاي سيپاتتايدى. الەۋمەتتىك جەلىلەردە بەلسەندى.
ەرەكشە تەحنيكاسى مەن كەسەلەردى بەينەلەۋگە دەگەن قۇشتارلىعى ونىڭ قولتاڭباسىن دارالايدى. ماريا بەينەلەۋ ونەرىن 12 جاسىندا باستاعان. ال ەتنو-شيك جانرىندا سۋرەت سالا باستاعانىنا 5 جىل بولدى.
ماريا يلنيسكايا، سۋرەتشى-يلليۋستراتور: - مەن باسقا ەلدەردە تۇرعاندا ەتنوستىڭ جوعارى باعالاناتىنىن بايقادىم. ءقازىر ۇلكەن تولقىن، ۇلكەن ءۇردىس بار – ءبىز قايدان كەلدىك، اتا-بابالارىمىز كىم بولعان، ءتۇپ-تامىرىمىز قانداي دەگەن سۇراقتارعا نازار اۋدارا باستادىق. سوندىقتان وسىنداي ادەمى ۇيلەسىم – زاماناۋي، جاھاندانعان الەم مەن تەرەڭ مادەني مۇرانى ۇشتاستىرۋ ەتنو-شيك دەپ اتالاتىن باعىتتىڭ پايدا بولۋىنا سەبەپ بولدى.
ءقازىر سيفرلىق يلليۋستراسيا كوپ قولدانىلادى. الايدا ماريا: «بەينەلەۋ ونەرى جانىما جاقىن»، – دەيدى. ول كەنەپتە عانا ەمەس، عيماراتتاردىڭ قابىرعالارىندا دا سۋرەت سالادى. سولاردىڭ ءبىرى – بالالاردى دامىتۋ ورتالىعىنىڭ قاسبەتىندە ورنالاسقان «ءبىلىم» مۋرالى. 9 دا 20 مەترلىك الىپ تۋىندىنى قالا تۇرعىندارى جوعارى باعالادى.
اقىلباي وسەرباي ۇلى، الماتى قالاسىنىڭ تۇرعىنى: - وسى كارتينانى كورىپ ءجۇرمىن، ءبىراق اسا ءمان بەرگەنىم جوق. سەبەبى ءقازىر پولوتنولاردى كومپيۋتەرمەن جاساپ شىعارادى عوي، سولاي شىعار دەپ ويلادىم دا، ءمان بەرگەنىم جوق. الىستان كوز تارتادى. كولەمى قانشا ۇلكەن بولسا دا، وتە كەرەمەت، شەبەر سالىنعان.
بۇل مۋرالدى سالۋعا اۋقىمدىلىعى عانا ەمەس، سونىمەن قاتار اۋا رايىنىڭ قولايسىزدىعى قيىندىق تۋدىرعان. سوعان قاراماستان سۋرەتشىنىڭ يدەياسى ىسكە استى.
ماريا يلنيسكايا، سۋرەتشى-يلليۋستراتور: - يلليۋستراسيانىڭ نەگىزگى يدەياسى – ءبىلىم تۋرالى ويلاعاندا كوز الدىمىزعا ەلەستەيتىن كورىنىستى سيپاتتاۋ. بۇل مىندەتتى تۇردە بۇلتسىز، جىلى، جارىق كۇن. ۇزىلىسكە شىققان بالالار اسىر سالىپ جۇگىرىپ، قۋانىشقا بولەنەدى. ولار ءارتۇرلى، ءبىراق سونىمەن بىرگە وتە تاتۋ، ءبىر-بىرىن قۇرمەتتەيدى. بۇل سۋرەت ءبىر كىشكەنتاي قازاقستاننىڭ بەينەسى سياقتى كورىنەدى.
ماريانىڭ ارمانى – قازاقستاندا ارت-بيزنەستى دامىتۋ، جاس تالانتتارعا بەينەلەۋ ونەرىنىڭ قىر-سىرىن ۇيرەتەتىن مەكتەپ اشۋ.