ەستونيا ەندى قازاقستاننان جۇك الۋعا نيەتتى

رەسەيگە ەنگىزگەن قارسى شەكتەۋ شارالارىنا بايلانىستى ەستونيا تەمىرجولىمەن جۇك تاسىمالداۋ كولەمى 60%-دان استامعا ازايعان.

ەستونيانىڭ Operail دەگەن مەملەكەتتىك تەمىرجول كومپانياسى سانكسيالارعا بايلانىستى رەسەي تاۋارلارىن تاسىمالداي المايدى. ەندى قازاقستان، وزبەكستان جانە تۇركىمەنستاننان جۇك جەتكىزبەك. بۇل تۋرالى كومپانيا باسشىسى راۋل توومسالعا ERR تەلەارناسىنا ايتتى، دەپ حابارلايدى Almaty-akshamy.kz Inbusiness.kz سىلتەمە جاساپ.

«بىلتىر ايىنا ورتا ەسەپپەن 1،2 ملن توننا جۇك تاسىمالدادىق. وسى جىلدىڭ ءبىرىنشى جارتىسىندا، اسىرەسە، ماۋسىم ايىندا جۇك تاسىمالى وتە قاتتى تومەندەپ كەتتى. ءقازىر ايىنا 500 مىڭ توننادان از تاسىمالدايمىز»، - دەدى توومسالۋ.

ونىڭ ايتۋىنشا، رەسەيگە قارسى شەكتەۋ شارالارىنا بايلانىستى ەستونيا تەمىرجولىمەن جۇك تاسىمالداۋ كولەمى 60%-دان استامعا ازايدى. كومپانيا توقتاپ تۇرعان جىلجىمالى قۇرامدى ىسكە قوسۋ ءۇشىن ورتالىق ازيا ەلدەرى: قازاقستان، وزبەكستان جانە تۇركىمەنستاننان جۇك ىزدەستىرىپ جاتىر.

Operail باسشىسى ورتالىق ازيا ەلدەرىنىڭ اراسىندا قازاقستاننىڭ الەۋەتى زور ەكەنىن ايتتى. تاۋاردى بالتىق ءدالىزى مەن فينليانديا ارقىلى تاسىمالداۋعا بولادى. سول جەردەن كومىر تاسۋعا بولادى. دەگەنمەن رەسەي ءوزىنىڭ تەمىر جولى ارقىلى ەستونياعا بارا جاتقان ۆاگونداردى كەز كەلگەن ساتە توقتاتىپ تاستاي الادى.