الماتى پوليسيا باسقارماسى قىزمەت بابىندا قازا تاپقان ارىپتەستەرىنىڭ بالالارى ءۇشىن ىستىقكولگە دەمالىس ۇيىمداستىردى
قىزمەت بابىندا قازا تاپقان پوليسيا قىزمەتكەرلەرىنىڭ بالالارى دەمالىسقا انالارىمەن بىرگە باردى، دەپ حابارلايدى almaty-akshamy.kz
دەمالۋشىلار ساناتىنا قۇقىق قورعاۋ ورگاندارىنىڭ كوپ بالالى وتباسىلارىنىڭ بالالارى، سونداي-اق مۇمكىندىگى شەكتەۋلى بالالار دا كىردى.
– ءبىزدىڭ يگى باستامامىزدى كەيبىر جاناشىر ازاماتتار بىردەن قولدادى، شىن جۇرەكتەن ريزاشىلىعىمىزدى، العىسىمىزدى بىلدىرەمىز. بالالار ەكى كەزەڭدە دەمالادى. ول تەك تەڭىز جاعاسىندا دەمالۋدى عانا ەمەس، سونىمەن قاتار ويىن-ساۋىق، ينتەللەكتۋالدىق، شىعارماشىلىق قىزىعۋشىلىقتى قامتيدى. سونىمەن قاتار قىزىقتى ەكسكۋرسيالار جوسپارلانعان. جالپى ون كۇندىك دەمالىس باعدارلاماسى وتە قانىق جانە بالالاردىڭ جاس ساناتىنا ارنالعان. ايتپاقشى، بۇل جاڭا وقۋ جىلىنىڭ الدىندا تەك دەمالىپ قانا قويماي، كۇش-قۋات، جاعىمدى ەموسيالار مەن اسەر الۋعا جاقسى مۇمكىندىك، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
انيماتورلار، سيقىرشىلار، تۋريستەر جيناعى بالالاردى تاڭ قالدىردى. اسىرەسە جاسوسپىرىمدەر پوليسيا تەحنيكاسىنىڭ كورمەسىنە قىزىعۋشىلىق تانىتتى. ۇلدار مەن قىزدار موتو-پاترۋل مەن ساپەردىڭ كيىمدەرىن كيىپ كوردى.