ەلىمىزدە ەسكى كولىكتەرگە سالىناتىن سالىق ازايادى. بۇل تۋرالى قارجى ۆيسە-مينيسترى ەرجان ءبىرجانوۆ ورتالىق كوممۋنيكاسيالار قىزمەتىندە وتكەن بريفينگتە ايتتى، دەپ حابارلايدى اlmaty-akshamy.kz.
ۆيسە-مينيستردىڭ ايتۋىنشا، كەي كولىك ءۇشىن سالىناتىن سالىق ەكى ەسەگە دەيىن قىسقارادى. بۇل وزگەرىس جاڭا سالىق كودەكسىندە ايقىندالعان.
جاڭا سالىق كودەكسىندە كولىك سالىعىنا قاتىستى وزگەرىستەر بار. پايدالانۋ ۋاقىتىنا قاراي سالىق مولشەرى قايتا قارالادى. كولىكتىڭ شىققانىنا 10 جىلدان اسسا، وعان 30%-دىق شەگەرىم بولادى. ەگەر اۆتوكولىكتىڭ پايدالانۋ مەرزىمى 20 جىلدان اسسا، 50%-دان اسا شەگەرىم جاسالادى. ياعني، ەسكى كولىك يەلەرىنە وسىنداي جەڭىلدىك قاراستىرىلعان. بۇل – ءبىرىنشى. ەكىنشىدەن، اۆتوكولىك تىركەۋدە بولماسا نەمەسە جوعالىپ كەتسە، بۇل مىندەتتى تۇردە قۇقىق قورعاۋ ورگاندارى ارقىلى راسىمدەلۋگە ءتيىس. ءىس قوزعالىپ، اۆتوكولىكتىڭ جوعالىپ كەتكەنى تۋرالى انىقتاما بولسا، كولىك سالىق بازاسىنا قوسىلمايدى، - دەيدى ەرجان ءبىرجانوۆ.
سونداي-اق ۆيسە-مينيستر كاسىبىن تۇراقتى تۇردە جۇرگىزبەيتىن ازاماتتاردىڭ جەكە كاسىپكەر رەتىندە تىركەلمەي قالاي سالىق تولەيتىنىن ايتتى.
تىركەۋسىز رەجيم تاكسي بولىپ قىزمەت ەتەتىن، جوندەۋ جۇمىستارىن جۇرگىزەتىن ازاماتتارعا قاتىستى بولىپ وتىر. ولاردا كاسسا اپپاراتى بولمايدى، تۇبىرتەكتى ەلەكتروندى تۇردە بەرەدى. ءقازىر پلاتفورمالىق جۇمىسپەن قامتاماسىز ەتۋ جوباسى ىسكە اسىرىلىپ، 12 مىڭ تاكسي جۇرگىزۋشىسى سول جوباعا ەنگىزىلىپ جاتىر. سول جوبانى ەندى زاڭداستىرىپ وتىرمىز. ولاردى جەكە كاسىپكەر رەتىندە تىركەۋدىڭ قاجەتى جوق. ولاردىڭ سالىق اينالىمىن، تابىس مولشەرىن قوسىمشا ارقىلى كورە الامىز. تاكسي جۇرگىزۋشىسىنە تۇسكەن تاپسىرىس پەن تۇبىرتەكتىڭ ءبارىن الىپ وتىرمىز، - دەيدى ۆيسە-مينيستر.