قازاقستاندا ەسكى گاز باللوندارىن جاڭالارىنا اۋىستىرۋ ءۇشىن قوسىمشا ايىرباستاۋ پۋنكتەرى اشىلماق. بۇل تۋرالى توتەنشە جاعدايلار مينيسترلىگىنىڭ ونەركاسىپتىك قاۋىپسىزدىك كوميتەتىنىڭ ءتوراعاسىنىڭ مىندەتىن اتقارۋشى راشيد دۋبايەۆ مالىمدەدى، دەپ حابارلايدى aqshamnews.kz..
ونىڭ ايتۋىنشا، كاسىپكەرلەرمەن ەسكى باللونداردى اۋىستىرۋ پروسەسىن جەڭىلدەتۋ جانە ولاردىڭ قاۋىپسىزدىگىن ارتتىرۋ ءۇشىن قوسىمشا ايىرباستاۋ پۋنكتەرىن اشۋ ماسەلەسى تالقىلانۋدا.
دۋبايەۆ كەلتىرگەن ستاتيستيكاعا سايكەس، 2018-2022 جىلدار ارالىعىندا قازاقستاندا گاز باللوندارىنىڭ جارىلۋى مەن گاز قوسپاسىنىڭ تۇتانۋىنىڭ 346 جاعدايى تىركەلگەن. بۇل وقيعالار سالدارىنان 522 ادام زارداپ شەگىپ، 97 ادام قايتىس بولعان. ال 2023 جىلى مۇنداي جاعدايلاردىڭ سانى 128-گە جەتىپ، 167 ادام جاراقات الىپ، 21 ادام قايتىس بولعان.
"جارىلىس كوبىنە قىس مەزگىلىندە بولادى. نەگىزگى سەبەپ — گاز باللوندارىن دۇرىس پايدالانۋ. ەكىنشى سەبەپ — كوپتەگەن گاز باللوندارى وزدەرىنىڭ قىزمەت ەتۋ مەرزىمىن وتكەن. ولاردىڭ اۋىستىرىلۋى ءتيىس ەكەنىن ەسكەرەتىن ارنايى تالاپتار بار. قازىرگى ۋاقىتتا وسى ماسەلە بويىنشا جۇمىس جۇرگىزىلۋدە. جەرگىلىكتى وندىرۋشىلەر تابىلىپ، جاڭا باللوندار شىعارۋعا دايىن"، — دەدى دۋبايەۆ.
سونىمەن قاتار، گاز باللوندارىنىڭ اينالىمى سيفرلاندىرۋ ارقىلى باقىلاۋدا بولاتىندىعىن ايتتى. بۇل قادام قاۋىپسىزدىكتى ارتتىرۋعا قوسىمشا كەپىلدىكتەر بەرەدى.