ەسىرتكى قىلمىسى ءۇشىن زاڭدا قانداي جازالار قاراستىرىلعان؟

الماتى پوليسەيلەرى ەسىرتكى قىلمىسى ءۇشىن زاڭدا قاراستىرىلعان جازالار تۋرالى ايتىپ بەردى.

پد-نىڭ ەسىرتكى قىلمىسىنا قارسى كۇرەس باسقارماسى، ەسىرتكىنى ساقتاۋ، ساتۋ، جارنامالاۋ، ەسىرتكى قويمالارىن ۇيىمداستىرۋ، قۇرامىندا ەسىرتكى بار وسىمدىكتەردى ءوسىرۋ جانە دارىلەر مەن مەديسينالىق ماقساتتاعى زاتتاردى پايدالانۋ ەرەجەلەرىن بۇزعانى ءۇشىن قانداي ءقاۋىپ تونەتىنى تۋرالى حابارلادى. ليسەنزياسى جوق دارى-دارمەكتەردى ساتقانى ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

بۇل ىس-ارەكەت ەسىرتكى ساتۋ رەتىندە قاراستىرىلادى (ق ر قك-نىڭ 297-بابى)، ول ءۇشىن زارداپتىڭ اۋىرلىعىنا قاراي 5 جىلدان 15 جىلعا دەيىنگى مەرزىمگە باس بوستاندىعىنان ايىرۋ كوزدەلگەن. ەسىرتكىنى كامەلەتكە تولماعان ادامعا نەمەسە ءبىلىم بەرۋ ۇيىمدارىندا ساتقانى ءۇشىن (ق ر قك-نىڭ 297-بابى 4-بولىگى) ءومىر بويىنا باس بوستاندىعىنان ايىرۋ كوزدەلگەن. سونىمەن قاتار تاجىريبەدە قۇرامىندا ەسىرتكىسى بار وسىمدىكتەردى ءوسىرۋ دەرەكتەرى دە بار.

قىلمىستىق زاڭعا سايكەس، مۇنداي وسىمدىكتەردى زاڭسىز ءوسىرۋ (ق ر قك-نىڭ 300-بابى) 3 جىلدان 8 جىلعا دەيىن باس بوستاندىعىنان ايىرۋدى قاراستىرادى. ال ەسىرتكى قويماسىن ۇيىمداستىرعانى ءۇشىن (ق ر قك-نىڭ 302-بابى) 3 جىلدان 7 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك قاراستىرىلعان. ەگەر بۇل زاڭسىز ارەكەتتەر بىرنەشە رەت جانە/نەمەسە قىلمىستىق توپ تاراپىنان جاسالسا، وندا مۇلكى تاركىلەنىپ، 7 جىلدان 12 جىلعا دەيىنگى مەرزىمگە باس بوستاندىعىنان ايىرۋعا جازالانادى. ەسىرتكى قۇرالدارىن ناسيحاتتاعانى نەمەسە زاڭسىز جارنامالاعانى ءۇشىن (ق ر قك-نىڭ 299-بابى، 1-1-بولىگى) مۇلكى تاركىلەنىپ، 3 جىلدان 6 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن.