ەسىرتكى جاسىرۋشىلاردىڭ جازاسى جەڭىلدەي مە؟

ءىىم ءمينيسترىنىڭ ايتۋىنشا، جاستار قۇقىقتىق ساۋاتسىزدىقتان قىلمىسقا ۇرىنادى ەكەن.

قازاقستاندا ەسىرتكى جاسىرۋشىلاردىڭ جازاسىن جەڭىلدەتۋ قاراستىرىلىپ جاتىر، دەپ حابارلايدى Almaty-akshamy.kz

ماجىلىستەگى ۇكىمەت ساعاتىندا ءىىم باسشىسى ەرجان سادەنوۆ ەسىرتكى جاسىرۋشىلار ءۇشىن جازانى جەڭىلدەتۋ جوسپارى تۋرالى ايتتى.

ەرجان سادەنوۆتىڭ ايتۋىنشا، جاستار وڭاي اقشا تابامىن دەپ، قۇقىقتىق ساۋاتىنىڭ بولماۋىنان وسى قىلمىسقا تاپ بولىپ جاتىر. كۇنى بۇگىنگە دەيىن ەسىرتكى جاسىرۋمەن اينالىسقان التى كامەلەتكە تولماعان ءجاسوسپىرىم سوتتالىپ، تاعى 26-سى قىلمىستىق جاۋاپكەرشىلىككە تارتىلعان.

"ەسىرتكى جاسىرۋمەن اينالىسقان جاسوسپىرىمدەردىڭ جازاسىن جەڭىلدەتۋ ماسەلەسى قاراستىرىلىپ جاتىر. ەگەر قىلمىس العاش رەت جاسالسا جانە تەرگەۋ كەزىندە ەسىرتكىمەن اينالىساتىن ناعىز كىنالىلەردى تابۋعا كومەكتەسسە جازاسى جەڭىلدەۋى مۇمكىن. ەسىرتكى زەرتحانالارىن ۇيىمداستىرۋعا جاۋاپكەرشىلىكتى كۇشەيتۋ بويىنشا تۇزەتۋلەر ازىرلەندى. ءقازىر ەسىرتكى زەرتحانالارىن ۇيىمداستىرعاندار مەن ساتۋمەن اينالىسقان ادامدار توبى اسا ءىرى كولەمدەگى ەسىرتكى ءۇشىن 10 جىلدان 15 جىلعا دەيىنگى جازا قولدانىلادى. ەندى ءدال وسى قىلمىس ءۇشىن ايىپتى قىلمىستىق كودەكستىڭ 297-بابى 4-بولىگىمەن 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرىلادى"، - دەدى مينيستر سادەنوۆ.