ماماندار سىناما جۇمىستارىن جۇرگىزىپ جاتىر.
ەسىل وبلىسارالىق باسسەيندىك بالىق شارۋاشىلىعى ينسپەكسياسىنىڭ قىزمەتكەرلەرى بالىق شارۋاشىلىعى سۋ ايدىندارىندا مونيتورينگ جۇرگىزۋ بارىسىندا ەسىل وزەنىندە بالىقتىڭ جاپپاي قىرىلۋىن توقتاتۋ جانە الداعى ۋاقىتتا ونى بولدىرماۋ ماقساتىندا جۇمىستار جۇرگىزدى، دەپ حابارلادى Almaty-akshamy.kz Turkystan.kz cىلتەمە جاساپ.
وسى ورايدا مۇز استىندا ولگەن بالىقتار جينالىپ، زەرتحانالىق زەرتتەۋگە جولداندى. قورىتىندىسى بەلگىلى بولعان سوڭ جاريالانادى. بولجام بويىنشا، بالىقتىڭ قىرىلۋى مۇز استىندا وتتەگىنىڭ جەتىسپەۋشىلىگىنەن بولۋى مۇمكىن.
«اتاپ ايتقاندا، اقمولا وبلىسىنىڭ استراحان اۋدانىنا قاراستى نوۆوچەركاسسكوە اۋىلى ماڭىنداعى ەسىل وزەنىنەن 85 كەلىگە جۋىق ولگەن بالىق جينالدى. ءقازىر اشم ۆەتەرينارلىق باقىلاۋ جانە قاداعالاۋ كوميتەتىنىڭ اقمولا وبلىستىق اۋماقتىق ينسپەكسياسىنىڭ وكىلدەرىمەن بىرلەسە سىناما جۇمىستارى جۇرگىزىلىپ جاتىر. قالعان بالىق سانيتارلىق نورمالاردى ساقتاي وتىرىپ، جويىلدى»،- دەلىنگەن حابارلامادا.
ءقازىر وزەن سۋىن ءماجبۇرلى اەراسيالاۋ ءۇشىن 2 موتوپومپا ورناتىلعان. بۇل مۇز استىنداعى سۋدى وتتەگىمەن قامتاماسىز ەتۋگە سەپ.
ەسكە سالا كەتسەك، بۇگىندە ەسىل وزەنى بالىق شارۋاشىلىعى سۋ ايدىندارىنىڭ رەزەرۆتىك قورىنا كىرەدى.
