بۇل سۇراققا كوپ ويلانۋدىڭ قاجەتى جوق. ول بۇعان دەيىن تالاي ايتىلىپ كەلە جاتقان قانت پەن فاستفۋد. بۇل ەكەۋى - ساۋ تەرىنىڭ باستى جاۋلارى.
اندريان ەسىمدى دارىگەر-دەرماتولوگ، كوسمەتولوگتىڭ ايتۋىنشا، فاستفۋد پەن قانت – ادەمى ءارى ساۋ تەرىنىڭ باستى جاۋلارى. مامان بۇل ەكەۋىنەن باسقا دا تەرىنىڭ ەرتە قارتايۋىنا اكەلەتىن ونىمدەردى اتادى.
اندريان كوپ جاعدايدا تەرىنىڭ دەنساۋلىعى مەن سۇلۋلىعى تاماقتانۋعا بايلانىستى ەكەنىن ءتۇسىندىردى.
«تەرىنىڭ باستى جاۋى - قانت. ول گليكاسيانى تۋدىرادى — ياعني، ول قانتتىڭ اقۋىزدارمەن بىرىگۋى جانە كوللاگەننىڭ ودان ءارى تىعىزدالۋى. بۇل پروسەستىڭ اسەرىنەن اجىمدەردىڭ پايدا بولۋى جىلدامدايدى»، - دەپ ەسكەرتتى ول.
الايدا، دارىگەردىڭ ايتۋىنشا، قانتتان تولىعىمەن باس تارتۋدىڭ قاجەتى جوق، تەك تاماقتانۋ راسيونىندا ونىڭ مولشەرىن ازايتۋ كەرەك. سول سەبەپتى ول كۇندەلىكتى مازىردە جىلدام كومىرسۋلاردىڭ مولشەرىن ازايتۋدى ۇسىندى.
تەرى دەنساۋلىعىنا فاستفۋد تا، سنەكتەر مەن الكوگول دە تەرىس اسەر ەتەدى، دەپ جالعاستىردى اندريان. الكوگول، دەرماتولوگتىڭ ايتۋىنشا، دەنەنىڭ سۋسىزدانىپ ، قۇرعاۋىن تۋدىرادى، سونىڭ سالدارىنان بەتتە تامىرلى تور پايدا بولادى، ۇساق اجىمدەر كورىنە باستايدى.
سونداي-اق، ىسىنۋگە بەيىم ادامدارعا 19:00-دەن كەيىن جەمىس جەمەۋگە تىرىسۋ كەرەك. سەبەبى، ولاردىڭ قۇرامىندا فرۋكتوزا بار، ول دا دەنەدەن سۋ شىعارادى. جەمىستەرگە بالاما رەتىندە انتيوكسيدانتقا باي مىنا جيدەكتەردى تۇتىنسا بولادى: تاڭقۋراي، كوكجيدەك، قاراقات، مۇكجيدەك.
تەرىنىڭ دەنساۋلىعىن ساقتاۋ ءۇشىن اندريان تالشىقتار مەن اقۋىزداردى جەتكىلىكتى مولشەردە تۇتىنۋعا كەڭەس بەردى. سونىمەن قاتار، ول اتاپ وتكەندەي، وسىمدىك اقۋىزدارى جانۋارلار اقۋىزىن الماستىرا المايدى.
«تەرىنىڭ ساۋلىعى ءۇشىن دۇرىس تاماقتانۋ عانا ەمەس، جالپى سالاۋاتتى ءومىر سالتىن ۇستانۋ دا ماڭىزدى. ول ءۇشىن قانىق ۇيقى، كۇيزەلىستەرمەن كۇرەسىپ، ۇنەمى جاتتىعۋلار جاساۋ كەرەك»، — دەپ قورىتىندىلادى دارىگەر.