الماتى ونكولوگيالىق ورتالىعىندا ءسۇت بەزى وبىرىن ەرتە انىقتاۋ ايلىعىنا ارنالعان اشىق ەسىك كۇنى ءوتتى.
بۇل شارانىڭ بارىسىندا 239 ايەل ونكولوگ-ماممولوگتىڭ كەڭەسىن الدى. قاتەرلى ىسىككە كۇدىگى بار 9 ناۋقاس انىقتالىپ، ولار ۋلترادىبىستىق زەرتتەۋدەن ءوتتى. ونكولوگيالىق ديسپانسەردىڭ كلينيكالىق دياگنوستيكا ءبولىمىنىڭ مەڭگەرۋشىسى نايليا اقجولوۆانىڭ ايتۋىنشا، قاجەتتى قوسىمشا تەكسەرۋلەردەن كەيىن ايەلدەرگە ارنايى ەم تاعايىندالادى، دەپ حابارلايدى Almaty-akshamy.kz.
«اشىق ەسىك كۇنى ونكولوگ-ماممولوگ ماماندار تەكسەرۋلەر مەن كونسۋلتاسيالاردان بولەك، ايەلدەرگە ءسۇت بەزىن وزدىگىنەن تەكسەرۋ ەرەجەلەرىن ۇيرەتىپ، كەلگەندەرگە ءسۇت بەزىن جۇيەلى تۇردە مامموگرافيالىق تەكسەرۋدەن وتكىزۋدىڭ ماڭىزدىلىعىن ءتۇسىندىردى. ءسۇت بەزىندە قانداي دا ءبىر ءتۇزىلىم پايدا بولعان جاعدايدا، بىردەن ماممولوگقا كورىنۋ كەرەك»، - دەيدى مامان.
ەستەرىڭىزگە سالايىق، دۇنيەجۇزىلىك ءسۇت بەزى وبىرىنا قارسى كۇرەس كۇنى اياسىندا الماتى ونكولوگيالىق ورتالىعى 2022 جىلعى قازاننىڭ بىرىنەن باستاپ اي بويى ءار سەنبى سايىن (1، 8، 15، 22، 29) ءسۇت بەزى وبىرىن ەرتە انىقتاۋ بويىنشا اشىق ەسىك كۇندەرىن وتكىزەدى.
ايتا كەتەيىك، الماتى قالاسىندا 6635 ايەل ءسۇت بەزى قاتەرلى ىسىگى دياگنوزىمەن ەسەپتە تۇر. ستاتيستيكاعا سايكەس، قالادا جىل سايىن 700-گە جۋىق ءسۇت بەزى قاتەرلى ىسىگىمەن اۋىراتىن ايەل انىقتالادى. كۇن سايىن قالادا وسى پاتولوگيامەن 2 ايەل اۋىرادى. 2021 جىلى الماتى قالاسىندا ءسۇت بەزى وبىرىنان 192 ايەل قايتىس بولعان، ونىڭ 50 پايىزى ەڭبەككە قابىلەتتى جاستاعى ايەلدەر.
الماتى ونكولوگيالىق ورتالىعى قالانىڭ بارلىق ايەلدەرىن تەگىن تەكسەرۋگە شاقىرادى.