تانىمال قازاقستاندىق كينو رەجيسسەرى، ءانشى، كومپوزيتور، اقىن جانە ونەرتانۋشى ەرلان تولەۋتاي بىشكەكتە وتكەن كينوفەستيۆالدىڭ ناتيجەسى بويىنشا ۇزدىك اكتەر اتاندى، دەپ حابارلايدى aqshamnews.kz
بىشكەكتە بەس كۇنگە سوزىلعان كينو، ديالوگ جانە شىعارماشىلىق جاڭالىقتارعا تولى كينوفەستيۆال ءوتتى. كينوفەستيۆال اياسىندا ورتالىق ازيا بايقاۋىنىڭ جەڭىمپازدارى انىقتالدى. ورتالىق ازيا بايقاۋىنىڭ جالپى جۇلدە قورى — 1 500 000 قىرعىز سومى.
“ۇزدىك اكتەر” نوميناسياسىن ەرلان تولەۋتاي “ءابىل” فيلمىندەگى ءرولى ءۇشىن جەڭىپ الدى. جۇلدە: 300 000 سوم نەمەسە شامامەن 1،7 ميلليون تەڭگە.
“ءابىل” ءفيلمى - كەڭەس وداعى ىدىراعاننان كەيىنگى كەزەڭدەگى اۋىل تىرشىلىگىن بەينەلەيتىن الەۋمەتتىك دراما. كارتينادا كولحوز بەن سوۆحوزداردىڭ تاراۋى، جاپپاي جەكەشەلەندىرۋ ءۇردىسى كەزىندە ادىلەتسىزدىككە تاپ بولعان قاراپايىم حالىقتىڭ تاعدىرى مەن قاراۋسىز قالعان اۋىلداعى بەيبەرەكەت تىرشىلىك كورىنىس تابادى.
تۋىندى تاۋەلسىزدىكتىڭ العاشقى جىلدارىنداعى قازاق قوعامىنىڭ رۋحاني كۇيزەلىسى مەن پسيحولوگيالىق احۋالىنا تەرەڭ ۇڭىلەدى. سونىمەن قاتار كەڭەستىك جۇيەدەگى ادام ءومىرىنىڭ قۇنسىزدانۋى، تۇرمىس ەرەكشەلىكتەرى، ءوز ەلىندە وگەيدىڭ كۇيىن كەشكەن قازاقتىڭ كۇيى، سوسياليزمنەن كاپيتاليزمگە وتپەلى كەزەڭدەگى ىشكى قايشىلىقتار مەن جاڭادان تامىر جايعان جەمقورلىق ماسەلەسى دە وتكىر قوزعالادى.
ءداستۇرلى ءانشى، ونەرتانۋشى، پۋبليسيست ەرلان تولەۋتاي فيلمدە باستى ءرولدى سومداعان. م.اۋەزوۆ تەاترىنىڭ بەلگىلى اكتەرلەرى نۇرجان بەكسۇلتانوۆا، ءاليحان لەپەسباي، ع.مۇسىرەپوۆ تەاترىنىڭ اكتەرى ۇلان نۇسىپالىلەر دە فيلمدە وينايدى.