الماتى قالاسى اكىمىنىڭ ورىنباسارى ە. باباقۇماروۆتىڭ توراعالىعىمەن وتكەن كوميسسيادا بيىلعى جىلدىڭ جۇمىس قورىتىندىسى شىعارىلىپ، كەلەسى جىلعا جوسپارلار بەلگىلەندى.
ساياسي قۋعىن-سۇرگىن قۇرباندارىن اقتاۋ ماسەلەلەرى جونىندەگى كوميسسيا جۇمىسىن قورىتىندىلاعاننان كەيىن ە. باباقۇماروۆ ءبىرقاتار باستى مىندەتتەردى بەلگىلەدى.
قالا اكىمىنىڭ ورىنباسارى مەملەكەتتىك حاتشى ق. كوشەربايەۆتىڭ جاقىندا وتكەن مەمكوميسسيادا بەرگەن تاپسىرمالارىن ەسكەرۋدى تاپسىردى. بۇل ازىرلەنىپ جاتقان 2022 جىلعا ارنالعان جۇمىس جوسپارىنا قاتىستى. جوسپاردا باسپا، پۋبليسيستيكالىق جانە زەرتتەۋ قىزمەتىن ۇيىمداستىرۋ ماسەلەلەرىن ەسكەرۋ قاجەت. سونىمەن قاتار، ءاقپاراتتىق-تۇسىندىرۋ جۇمىستارىنا، تاقىرىپتىق كورمەلەر وتكىزۋگە، تمد قالالارىنىڭ مۇراعاتتارىنا عىلىمي ەكسپەديسيالار ۇيىمداستىرۋعا نازار اۋدارۋ تاپسىرىلدى.
سونداي-اق ارحيۆتەرمەن جۇمىس ىستەۋ كەزىندە قۇقىق قورعاۋ جانە ارنايى ورگاندارمەن قىزمەتتى ۇيلەستىرۋ بويىنشا مىندەت قويىلدى.
وتىرىستى قورىتىندىلاي كەلە، ە. باباقۇماروۆ كوميسسيا مۇشەلەرىنە جۇمىسى ءۇشىن ريزاشىلىق ءبىلدىرىپ، ولارعا العىس حاتتاردى تاپسىردى.