ەرجان باباقۇماروۆ ابۋ-دابيدە دجيۋ-دجيتسۋدان وتكەن حالىقارالىق ءتۋرنيردىڭ جەڭىمپازدارىنا مەملەكەت باسشىسىنىڭ قۇتتىقتاۋىن وقىپ بەردى

الماتى اكىمدىگى سپورتشىلارعا قولداۋ كورسەتتى

الماتىدا قالا اكىمدىگىنىڭ قولداۋىمەن ەل تاۋەلسىزدىگىنىڭ 30 جىلدىعى اياسىندا دجيۋ-دجيتسۋدان Almaty jiu-jitsu kids cup حالىقارالىق ءتۋرنيرى ءوتتى. جارىسقا قىرعىزستان مەن وزبەكستان سپورتشىلارى كەلدى. سونداي-اق تۋرنير اياسىندا ابۋ-دابيدە وتكەن الەم چەمپيوناتىنىڭ جۇلدەگەرلەرىنە قۇرمەت كورسەتىلدى، دەپ حابارلايدى Almaty-akshamy.kz

Abu Dhabi World Jiu-Jitsu Championship تۋرنيرىندە ساعادات نۇرماعامبەتوۆ اتىنداعى كلۋبتىڭ سپورتشىلارى 9 التىن، 5 كۇمىس جانە 4 قولا مەدال جەڭىپ الدى. ولاردىڭ بارلىعى - 8 جاستان 15 جاسقا دەيىنگى جاس ساناتىنداعىلار. وسىلايشا قازاقستان قۇراماسى بالالار مەن جاسوسپىرىمدەر اراسىنداعى چەمپيوناتتا جالپىكوماندالىق ءبىرىنشى ورىندى يەلەندى.

سونىمەن قاتار، 14 جاسار جىبەك قالىمبەتوۆا ابۋ-دابيدە دجيۋ-دجيتسۋدان ءتورتىنشى رەت الەم چەمپيونى اتاندى. نۇراي التىنبەك ەكى دۇركىن الەم چەمپيونى، رايىمبەك ەرجان ەكى دۇركىن الەم چەمپيوناتىنىڭ قولا جۇلدەگەرى اتاندى.

الماتى اكىمىنىڭ ورىنباسارى ەرجان باباقۇماروۆ ابۋ-دابيدەگى حالىقارالىق جارىس جەڭىمپازدارىنا مەملەكەت باسشىسىنىڭ قۇتتىقتاۋ حاتىن وقىپ بەردى. ەل پرەزيدەنتى مۇنداي جارىستاردىڭ وسكەلەڭ ۇرپاقتى قىزىقتىراتىنىنا جانە سالاۋاتتى ءومىر سالتىن ناسيحاتتاۋعا ىقپال ەتەتىنىنە سەنىم ءبىلدىردى.

«جاسىراتىنى جوق، قازاقستاندىقتار جاۋىنگەرلىك ونەرلەرگە قىزىعۋشىلىق تانىتادى. ءبىز سپورت شەبەرلەرىمىزدىڭ جارقىن جەڭىستەرىن ماقتان تۇتامىز. دجيۋ-دجيتسۋ سوڭعى جىلدارى قارقىندى دامىپ كەلەدى، ءبىزدىڭ قۇراما ازيا جانە الەم چەمپيوناتتارىندا تانىمال بولدى. بۇل تۋرنير دە سپورتتىڭ وسى ءتۇرىن دامىتۋعا سەپتىگىن تيگىزەدى دەپ ويلايمىن»، - دەلىنگەن پرەزيدەنت ق.-ج. توقايەۆتىڭ قۇتتىقتاۋىندا.

ە. باباقۇماروۆ جۇلدەلى ورىندارعا يە بولعان س. نۇرماعامبەتوۆ اتىنداعى كلۋبتىڭ تاربيەلەنۋشىلەرىن قۇتتىقتاپ، ولارعا الماتى اكىمى ب. ساعىنتايەۆتىڭ اتىنان العىس حاتتار تابىس ەتتى.

قالا اكىمىنىڭ ورىنباسارى جاس سپورتشىلاردىڭ مىقتى رۋحىن تاربيەلەگەن الماتى دجيۋ-دجيتسۋ مەكتەبىنىڭ جەتىستىكتەرىن اتاپ ءوتتى. ە. باباقۇماروۆتىڭ ايتۋىنشا، كۇندەلىكتى ەڭبەك بارىسىندا چەمپيون اتانادى.

«ءسىز سپورتتا العاشقى قادام جاساعان قۇرداستارىڭىزدى عانا ەمەس، ەرەسەكتەردى دە شابىتتاندىراسىز. سىزدەردىڭ ەرەن جەتىستىكتەرىڭىزگە كومەكتەسەتىن بالالار جاتتىقتىرۋشىلارىنا العىس ايتقىم كەلەدى. بۇل - ەرەكشە ميسسيا»، - دەدى اكىمنىڭ ورىنباسارى.

سونداي-اق، مادەنيەت جانە سپورت ءمينيسترى ا. رايىمقۇلوۆا دا جىلى لەبىزدەرىن ءبىلدىردى. ونىڭ اتىنان ايتىلعان العىس سوزدە قازاقستاندىق سپورت الەمدىك سپورت ارەناسىندا قۇرمەتتى ورىنعا لايىق دەلىنگەن. ەلىمىزدە چەمپيونداردى تاربيەلەۋگە، دەنى ساۋ ۇرپاقتى وسىرۋگە بارلىق جاعداي جاسالعان.

Almaty jiu-jitsu kids cup ءتۋرنيرىن قازاقستاننىڭ حالىق قاھارمانى، ارميا گەنەرالى ساعادات نۇرماعامبەتوۆ اتىنداعى Sagadat Batyr - QTT سپورت كلۋبى ۇيىمداستىردى. مۇندا بالالار، جاسوسپىرىمدەر جانە ەرەسەكتەر سپورتشىلار اينالىسادى. ولار چەمپيوندىق بەلدىكتەردى جەڭىپ، دجيۋ-دجيتسۋ مەن گرەپپلينگتەن سپورت شەبەرى بولادى.

جارىسقا 6-15 جاس ارالىعىنداعى 300-دەن استام جاس سپورتشىلار، سونىڭ ىشىندە بالالار ءۇيىنىڭ تاربيەلەنۋشىلەرى قاتىستى. ولاردىڭ اراسىندا ازيا، الەم چەمپيوندارى مەن ءىرى حالىقارالىق جارىستاردىڭ جۇلدەگەرلەرى بار. اكىمدىكتىڭ قولداۋىمەن كلۋبتا «جانۇيا» وتباسى ۇلگىسىندەگى بالالار ءۇيىنىڭ 20 تاربيەلەنۋشىسى تەگىن جاتتىعادى. ولاردىڭ بارلىعى قاجەتتى جابدىقتارمەن قامتاماسىز ەتىلگەن.

ەسكە سالساق، جان باسىنا قارجىلاندىرۋ جۇيەسى ارقىلى بالالار سپورتىن قولداۋ ماقساتىندا الماتى اكىمدىگى وسى جىلى 40 مىڭ بالانى ءتۇرلى سپورت سەكسيالارىندا تەگىن جاتتىعۋمەن قامتاماسىز ەتۋ ءۇشىن 1،5 ميلليارد تەڭگە باعىتتادى.