2023 جىلدىڭ 12-13 مامىر كۇندەرى الەمگە ايگىلى سكريپكاشى مارات بيسەنعالييەۆ پەن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ بىرلەسكەن العاشقى كونسەرتى وتەدى.
اتاقتى ۆيرتۋوز سكريپكاشىنىڭ قازاق حالقىنىڭ مۋزىكا مادەنيەتىنىڭ قاراشاڭىراعىنا اينالعان ۇلتتىق وركەسترمەن بەرەتىن كونسەرتى - ەلىمىزدىڭ مادەني تاريحىندا العاش ۇيىمداستىرىلعان ەرەشە پرەمەرا. كونسەرتتە تالانتتى جاس مۋزىكانت، م. بيسەنعالييەۆتىڭ NCPA اكادەمياسىنىڭ تاربيەلەنۋشىسى ايان دەسپاندە ونەر كورسەتەدى، دەپ حابارلايدى Almaty-akshamy.kz.
مارات بيسەنعالييەۆ – كوركەمدىك جەتەكشى، باس ديريجەر جانە سوليست. دارىندى ونەر يەسى - الەمدىك مۋزىكا مادەنيەتىندە وزىندىك ورنى بار دارابوز مۋزىكانت. ول - حالىقارالىق مۋزىكا مادەنيەتىنە قوسقان ۇلەسى ءۇشىن التىن ديسكىلەردىڭ جانە كوپتەگەن ۇكىمەتتىك ناگرادالاردىڭ يەگەرى. بۇكىلالەمدىك Carnegie Hall، Lincoln Centre (NewYork) Wigmore Hall، Barbican Center، Royal AlbertHall، Royal festivalhall (لوندون) سىندى مۋزىكا ساحنالارىندا ونەر كورسەتىپ، Naxos، Marco Polo، EMI، Sony BMG سياقتى الەمگە ايگىلى رەكوردتىق كومپانيالارمەن ىنتىماقتاستىقتا بولا وتىرىپ، الەمدىك مۋزىكالىق مادەنيەتتىڭ قازىناسىنا ءوزىنىڭ مۋزىكالىق شىعارمالارىن ەنگىزدى.
مارات بيسەنعالييەۆتىڭ ونەرى تۋرالى اتاقتى بريتاندىق «The Times» گازەتى «brilliant violin soloist»، «كەرەمەت سكريپكا ءسوليسى» دەپ جازسا، ال امەريكالىق «Fanfare» جۋرنالى «قازىرگى زامانعى يزاي» دەپ جازدى. سونداي-اق، «The New York Times» ونەر يەسى تۋرالى: «ول XIX عاسىردىڭ باسىنداعى سكريپكادا ويناۋ شەبەرلىگىنىڭ ايرىقشا بەلگىسى بولعان ۇتىمدى ستيلدەردى جانداندارىپ قايتا جاڭعىرتۋشى» دەپ جازدى.
Aيان (piano) 2013 جىلs 27 جەلتوقسانىندا توكيودا دۇنيەگە كەلدى. ول 2021 جىلدىڭ مامىرىنان باستاپ مۋمبايداعى (SOI) ءۇندىستان سيمفونيالىق وركەسترىنىڭ مۋزىكالىق اكادەمياسىندا فورتەپيانو ماماندىعى بويىنشا ءبىلىم الدى. 2021 جىلدىڭ قاراشا ايىندا ايان تاتا تەاترىندا مارات بيسەنعالييەۆتىڭ جەتەكشىلىگىندەگى سوي كامەرالىق وركەسترىمەن العاشقى كونسەرتىن بەرىپ، كەيىن ءۇندىستاننىڭ ءتۇرلى كونسەرت زالدارىنىڭ تۇراقتى قوناعىنا اينالدى. ايان فورتەپيانودا ويناپ قانا قويماي مۋزىكالىق شىعارمالاردى دا جازۋدى ۇناتادى. ول سوناتا، ۆالس، نوكتيۋرن، فورتەپيانو مەن ىشەكتى اسپاپتارعا ارنالعان كۆينتەت جانە ت.ب.شىعارمالاردى جازدى. Aيان ۆەنادا وتكەن «التىن كىلت» مۋزىكالىق فەستيۆالىنىڭ فورتەپيانو مەن كومپوزيسيانىڭ ەكى ساناتى بويىنشا جەڭىمپازى بولا وتىرىپ، موسارتتىڭ ۇيىندە وتكەن Palais Ehrbar جانە Bӧsendorfer Hall جەڭىمپازدارىنىڭ گالا-كونسەرتىنە قاتىستى.