الماتى قالالىق پسيحيكالىق ورتالىعى «SenQ» برەندىنىڭ جەتەكشىسى ءجاميلا سەيىتجانمەن جانە سۋرەتشى داريا قاسىموۆامەن بىرلەسىپ، «مەنىڭ اۆتورلىق ورامالىم» اتتى ەرەكشە شەبەرلىك ءدارىسىن ۇيىمداستىرعان بولاتىن.
وعان ەرەكشە بالالار تاربيەلەپ وتىرعان 15 الماتىلىق ايەل-انا قاتىستى، دەپ حابارلايدى Almaty-akshamy.kz
بۇل جوبانىڭ ماقساتى – ەرەكشە بالالاردى باعىپ-قاعىپ، پەرزەنتىنە عۇمىرىن ارناپ جۇرگەن انالارعا قۋانىش، جاقسى كۇن سىيلاۋ جانە پسيحيكالىق اۋرۋلارعا شالدىققان جانداردىڭ وزەكتى ماسەلەسىنە قوعام نازارىن اۋدارۋ.
جوباعا قاتىسقان ايەلدەرگە ارت-تەراپيالىق شەبەرلىك دارىسىندە قيالىندا، تۇيسىگىندە نە تۇر، سونى اق قاعاز بەتىنە ءتۇرلى بوياۋمەن بەينەلەۋگە مۇمكىندىك ۇسىنىلدى. ولار الدىمەن ارت-تەراپيانىڭ ادىس-تاسىلدەرىمەن تانىستى. بوي، وي سەرگىتەتىن جاتتىعۋلار جاساعاننان كەيىن، قىلقالامدى قولعا الىپ، ءتۇرلى تاقىرىپتا سۋرەتتەر سالا باستادى.
– ارت-تەراپيادا قاتىپ قالعان ەرەجە جوق، ادام نەنى بەينەلەگىسى كەلسە، سونى قاعازعا تۇسىرە بەرەدى. جوباعا قاتىسقان انالار كوك اسپاندى، وندا قالىقتاعان قۇستاردى، جارقىرعان كۇندى، اشىق ءتۇستى گۇلدەردى، انا مەن بالانى، بيىك-بيىك تاۋلاردى بەينەلەدى. وسىلايشا ەرەكشە بالا ءوسىرىپ وتىرعان انالار ءبىر ساتكە بولسا دا تىرشىلىك تاۋقىمەتىن ۇمىتىپ، قيالىنا، شابىتىنا ەرىك بەرىپ، شىعارماشىلىق الەمگە ساياحاتتادى. مۇنداي ارت-تەراپيا انا مەن بالانى ودان ءارى جاقىنداستىرا تۇسەدى، ولار سۋرەت سالۋ ارقىلى ءبىرىن-بىرى جاقسى تۇسىنەتىن بولادى، – دەيدى سۋرەتشى داريا قاسىموۆا.
بۇگىندە ەلىمىزدە ينكليۋزيۆتى ورتانى دامىتۋ ماسەلەسىنىڭ جان-جاقتى قولعا الىنىپ جاتقانى قۋانتادى. ال بۇگىنگى ارت-تەراپيا ءبىزدىڭ مەگاپوليستە العاش رەت ۇيىمداستىرىلىپ وتىر.
«مەنىڭ اۆتورلىق ورامالىم» جوباسىنىڭ ەڭ ءبىر اسەرلى ءساتى سول، ونىڭ دەمەۋشىسى – وتاندىق برەند سانالاتىن «SenQ» ديزاينەرلەرى انالار سالعان قاعازداعى سۋرەتتەردى ماتاعا كوشىرىپ باستى. ءسويتىپ ءار اۆتورعا ءوزى سالعان سۋرەت پەن ەسىمى جازىلعان ورامال سالتاناتتى تۇردە تارتۋ ەتىلدى.
ساپار راحمەنشەيەۆ، الماتى قالالىق پسيحيكالىق ساۋىقتىرۋ ورتالىعىنىڭ ديرەكتورى:
– بۇگىندە الماتى قالاسى بويىنشا 2500-دەن استام بالا ديسپانسەرلىك ەسەپتە تۇر. ولار اقىل-ەسىنىڭ كەمىستىگى بار، اۋتيزم، شيزوفرەنيا، ورگانيكالىق وزگەرىستەر دياگنوزدارى بار جەتكىنشەكتەر. ورتالىقتىڭ باستى مىندەتى – وسى ديسپانسەرلىك باقىلاۋدا تۇرعان بالالاردى قوعامعا بەيىمدەۋ. جۋىردا بالالارعا ارنالعان تەاتر سىنىبىن اشۋ ويىمىزدا بار. بۇعان دەيىن ەرەسەكتەرگە ارنالعان «قىسقى ب ا ق» اشقان ەدىك. ەندى ارنايى جەر ءبولىپ، كىشكەنتاي بالالارعا دا ارناپ ب ا ق اشامىز دەپ وتىرمىز. بالالار سول باققا ءوز قولىمەن ءتۇرلى اعاش پەن گۇل وتىرعىزاتىن بولادى. ءبىز ولارعا اۋرۋ دەپ ەمەس، قوعامنىڭ ءبىر مۇشەسى دەپ قاراۋىمىز كەرەك. ەرەكشە كۇتىمدى قاجەت ەتەتىن بالالاردى تاربيەلەپ وتىرعان اتا-انالاردىڭ دا قامقورلىقتان تىس قالماعانى دۇرىس. سول ءۇشىن دە وسى جوبانى قولعا الدىق. بالامەن ءجۇرىپ ءوزىن ۇمىتىپ كەتەتىن ايەل-انالارعا وسىلاي قولداۋ كورسەتۋدى داستۇرگە اينالدىرۋدى كوزدەپ وتىرمىز. الداعى ۋاقىتتا ەرەكشە بالا تاربيەلەپ وتىرعان اكەلەردى دە قاتىستىرساق دەيمىز.