كوپ ىزدەنىپ، كىتاپتار وقىدىم
جەتىساي اۋدانى اسىق اتا اۋىلىنىڭ تۇرعىنى مادينا داۋرەنبەك ەلەكتر قۋاتى ارقىلى جارقىرايتىن گۇلدەرمەن كومكەرىلگەن شامدار جاسايدى. ەرەكشە ديزاينمەن ازىرلەنەتىن بۇيىمداردىڭ ساپاسى جوعارى، باعاسى دا ارزان. سوندىقتان قىزىعۋشىلار دا كوپ. بۇل تۋرالى قازاقپارات جازدى.
مادينانى قولونەرگە اكەسى التاي باۋلىعان. وعان پەردە، قۇراق كورپە، ساۋكەلە سەكىلدى ۇلتتىق ناقىشتاعى كيىمدەردى تىگۋ ەش قيىندىق تۋدىرمايدى. ال مونشاقتاردان ءتۇرلى بۇيىمدار جاساۋ – سۇيىكتى ءىسى. مادينا ۋاقىت وتە كەلە بويىنداعى بار قابىلەتىن كاسىپكە قاراي بۇرۋدى ويلايدى.
«كوپ ىزدەنىپ، كىتاپتار وقىدىم. عالامتور ارقىلى جارىقشامداردىڭ جاسالۋ جولدارىن ۇيرەندىم. سونىمەن العاشقى جاساعان دۇنيەلەرىمدى ينستاگرام ارقىلى ساۋداعا شىعاردىم. تەز ءوتىپ كەتتى. سۇرانىستىڭ جوعارى ەكەندىگى ماعان شابىت سىيلادى» – دەيدى ول.
نەگىزگى تۇتىنۋشىلارى – اقتاۋ، اتىراۋ، اقتوبە، قاراعاندى، قىزىلوردا، وسكەنمەن قالالارىنىڭ تۇرعىندارى. گۇل، كورزينا، قۋىرشاق كەيپىندە جاسالعان بۇيىمدارىن اپتاسىنا ءبىر رەت تاپسىرىس بەرۋشىلەرگە پوشتا ارقىلى سالىپ جىبەرەدى. ال جاقىن ماڭداعى قالالارعا اۆتوبۋستاردىڭ قىزمەتىن پايدالاندى. مادينا جاساعان زاتتاردى العان ادامدار ساپاسى بويىنشا ءالى ەشقانداي سىن ايتپاعان.
«العاشقىدا 30 000 تەڭگەمەن باستاعان بيزنەسىمنەن ءقازىر ايىنا 400-500 مىڭ تەڭگە تاۋىپ وتىرمىن. قاجەتتى زاتتاردى رەسەيدەن ارنايى تاپسىرىسپەن الدىرامىز» – دەيدى ول.
قولونەرشى كەلىنشەك «بيزنەس باستاۋ» كۋرسىنا قاتىسىپ، 505 000 تەڭگە گرانتتى جەڭىپ العان. ول قارجىعى قاجەتتى قۇرىلعىلاردى ساتىپ الىپتى. ەندىگى ماقساتى كاسىبىن كەڭەيتىپ، جاڭا سەح سالۋ.
«كۇنىنە 50 داناعا دەيىن جارىقشامدار جاسايمىن. ەڭ ارزانى 4 000 تەڭگەدەن باستالادى. ءقازىر ۇيدەگى ءبىر بولمەمدى سەح رەتىندە پايدالانىپ كەلەمىن. الداعى ۋاقىتتا جاڭا سەح سالۋدى جوسپارلاپ وتىرمىز» – دەيدى تۇرعىن.