جوبا ءاۋتيزمى بار بالالاردىڭ قوعامعا بەيىمدەۋگە باعىتتالعان
قاراعاندى وبلىسى رەسپۋبليكادا ءبىرىنشى بولىپ اۋتيست بالالارعا ارنالعان سپورتتىق جوبانى ىسكە قوستى. ول ءۇشىن ون جاتتىقتىرۋشى ارنايى وقىتىلىپ، «بەيىمدەلگەن دەنە شىنىقتىرۋ» كۋرسى بويىنشا ساباقتار وتكىزىپ جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
«جوبا ءبىر ايدان بەرى جۇمىس ىستەۋدە. ون جاتتىقتىرۋشى ونلاين-فورماتتا رەسەي اكادەمياسىندا وقىتۋدان وتۋدە، سونىمەن قاتار جۇمىس ىستەيدى. بۇعان قوسا ولاردىڭ ون كومەكشىسى بار. مەملەكەتتىك تاپسىرىس بويىنشا ءبىز قاراعاندى، تەمىرتاۋ جانە ساران قالالارىندا 80 بالانى جينادىق. جوبا ءاۋتيزمى بار بالالاردىڭ قوعامعا بەيىمدەلۋىنە باعىتتالعان. وسى از ۋاقىت ىشىندە ءبىز ناتيجەلەردى كورىپ وتىرمىز»، - دەدى اۋتيزم جانە مەنتالدىق بۇزىلىستارى بار بالالارعا ارنالعان سپورتتىق-ساۋىقتىرۋ جوباسىنىڭ جەتەكشىسى گاۋحار اكيجانوۆا.
ساباقتار اپتاسىنا ەكى رەت، ءبىر جارىم ساعاتتان وتەدى. الدىمەن گيمناستيكا جانە قۇرلىقتا بەيىمدەلگەن جاتتىعۋلار، سودان كەيىن ءجۇزۋ. جوبا جەتەكشىسىنىڭ ايتۋىنشا، بەيىمدەلۋدەن كەيىن اپتاسىنا تاعى ءبىر ساباق قوسۋ جوسپارلانۋدا.
«وسى ءبىر ايدىڭ ىشىندە ءبىز دوستاسىپ كەتتىك. ءار بالانىڭ يكەمىن تابۋ كەرەك. ناتيجەلەردى كورگەندە، بالا بارلىعىن ويداعىداي ورىنداعاندا، قۋانامىز»، - دەپ ءبولىستى جاتتىقتىرۋشى ەلەنا راينگاردت. اتا-انالار دا وتە ريزا.
«مەنىڭ ۇلىم 11 جاستا. ءبىز ءجۇزۋ ءبولىمى تۋرالى بىلگەندە وتە قۋاندىق. ساباقتار تەگىن. ءبىزدىڭ بالالار سۋدى جاقسى كورەدى، ول ولاردى تىنىشتاندىرادى. ءبىز ۇيىمداستىرۋشىلارعا، جاتتىقتىرۋشىلارعا ريزامىز»، - دەيدى ەرەكشە بالانىڭ اناسى قارلىعاش ءجۇمادىلوۆا.
بۇل وڭىردەگى مۇگەدەك ادامدارعا سپورت نىساندارىنىڭ قولجەتىمدىلىگى ءۇشىن جاسالىپ جاتقان جالعىز نارسە ەمەس. مەملەكەتتىك تاپسىرىس بويىنشا جۇزدەن استام ەرەكشە بالا تاەكۆوندو جانە شاحمات سەكسيالارىندا شۇعىلدانادى.
مەكتەپتە مۇگەدەكتەر سپورتى بويىنشا جاتتىقتىرۋشىلار شتاتى ۇلعايتىلدى. جۇمىس ىستەپ تۇرعان سپورت نىساندارى مۇمكىندىگى شەكتەۋلى ادامدارعا بەيىمدەلۋدە. ينكليۋزيانى ەسكەرە وتىرىپ، جاڭا سپورت الاڭدارى سالىنۋدا.