الماتى يپپودرومىنىڭ يەلەرى ناۋرىز ايىنىڭ سوڭىنا دەيىن ونىڭ دامۋ باعدارلاماسىن ۇسىنۋى ءتيىس. بۇل تۋرالى شاھار باسشىسى جەتىسۋ اۋدانى تۇرعىندارىمەن كەزدەسۋ بارىسىندا مالىمدەدى، دەپ حابارلايدى aqshamnews.kz
قالا اكىمىنىڭ ايتۋىنشا، وتكەن جىلدان بەرى يپپودروم يەلەرىمەن كەلىسسوزدەر جۇرگىزىلىپ جاتىر. ولار ناۋرىز ايىنىڭ سوڭىنا دەيىن دامۋ باعدارلاماسىن ۇسىنۋى كەرەك، بۇل ەڭ الدىمەن، ايتارلىقتاي قارجىنى قاجەت ەتەدى. دەگەنمەن، ەربولات دوسايەۆ يپپودرومنىڭ ماقساتتى باعىتى وزگەرىسسىز قالاتىنىن اتاپ ءوتتى.
«ەگەر مەنشىك يەلەرى جاڭارتۋ جۇمىستارىن جۇرگىزبەسە، ءبىز جاڭا ينۆەستور ىزدەيمىز نەمەسە بۇل مىندەتتى قالا ءوز موينىنا الۋى مۇمكىن، ءبىراق بۇل وتە قىمبات جوبا. جازعا دەيىن الماتى يپپودرومىنىڭ بولاشاعى قالاي بولاتىنىن انىقتاۋعا تىرىسامىز»، – دەدى ەربولات دوسايەۆ.