بۇل تۋرالى الماتى اكىمى ەربولات دوسايەۆ اۋەزوۆ اۋدانىنىڭ تۇرعىندارىمەن كەزدەسۋ بارىسىندا ايتتى.
تۇرعىننىڭ سۇراعى:
- رايىمبەك داڭعىلىندا جوسپارلانعان برت جوباسىن قايتا قاراۋ مۇمكىن ەمەس پە؟ ونى رايىمبەك داڭعىلىندا جاساماڭىز، مۇندا بازارلار بار، وبلىستان ادامدار كەلەدى.
الماتى اكىمى ەربولات دوسايەۆتىڭ جاۋابى:
– بىرىنشىدەن رايىمبەك داڭعىلىنىڭ قالالىق جول ەكەنىن ءتۇسىنۋ قاجەت، تيىسىنشە ءبىز برت جوباسىن ىسكە اسىراتىن بولامىز، ويتكەنى قالانى دامىتۋ قاجەت. ءبىزدىڭ باسىمدىعىمىز – قوعامدىق كولىك، بۇگىندە ول رايىمبەكتە ءتيىمسىز.
ايتا كەتۋ كەرەك، رايىمبەك داڭعىلى بويىنشا برت-نىڭ جالپى ۇزىندىعى 17 كم قۇرايدى، جوبا سونىمەن قاتار "التىن وردا" كولىك-اۋىسىپ وتىرۋ تورابىن (كات) قۇرۋدى قامتيدى.
جوبانى ىسكە اسىرۋ كەزىندە قوعامدىق كولىككە بولىنگەن جولاقتاردىڭ ۇزىندىعى ءدالىز ۇزىندىعىنان 70%-دان 90%-عا دەيىن وسەدى، پلاتفورمالارى بار سول جاق جولاقتا بولىنگەن جولاقتار پايدا بولادى، ال قوعامدىق كولىكتىڭ قوزعالىس جىلدامدىعى 70%-عا وسەدى. وسىلايشا، ءدالىزدىڭ بۇكىل بويىندا قوعامدىق كولىكتىڭ باسىمدىعى قامتاماسىز ەتىلەدى، قاربالاس ساعاتتاعى ورتاشا قوزعالىس ارالىعى شامامەن 5 مينۋتتى قۇرايدى.
جوبانى 2 كەزەڭدە ىسكە اسىرۋ جوسپارلانۋدا.
- ءبىرىنشىسى – اعىمداعى جىلى رايىمبەك داڭعىلىنىڭ احريمەنكو كوشەسىنەن پۋشكين كوشەسىنە دەيىنگى ورتالىق ۋچاسكەسىندە بولىنگەن جولاقتار رەتتەلەدى. قۇرىلىس-مونتاج جۇمىستارى 2024 جىلدىڭ ەكىنشى جارتىجىلدىعىنا جوسپارلانعان.
- ەكىنشى كەزەڭ باتىس بولىكتى قامتيدى – احريمەنكو كوشەسىنەن باستاپ "بارلىق" بازارىنا دەيىن، -2025-2026 جىلدارى ىسكە اسىرىلادى. سونداي-اق، وسى كەزەڭدە رايىمبەك داڭعىلىن پۋشكين كوشەسىنەن "شىعىس" كولىككە اۋىسىپ وتىرۋ تورابىنا دەيىن ۇزارتۋ جوسپارلانعان.