ەندى زاڭسىز فونوگرامما قولدانعاندار جاۋاپكەرشىلىككە تارتىلادى

ءماجىلىس مادەني ءىس-شارالاردا فونوگرامما قولدانۋعا قاتىستى تالاپتاردى كۇشەيتتى، - دەپ حابارلايدى Aqshamnews.kz ءتىلشىسى. 

24 قىركۇيەكتە ءماجىلىس مادەنيەت، ءبىلىم بەرۋ، وتباسى جانە مەملەكەتتىك باقىلاۋ سالاسىنا قاتىستى زاڭنامالىق تۇزەتۋلەردى ەكىنشى وقىلىمدا قابىلدادى. قۇجاتتا كونسەرتتەر مەن باسقا دا مادەني-بۇقارالىق ءىس-شارالاردا فونوگرامما قولدانۋ ەرەجەلەرى قاتاڭداتىلدى.

جۇمىس توبىنىڭ جەتەكشىسى، دەپۋتات رينات زايىتتىڭ ايتۋىنشا، جاڭا تالاپتار فونوگرامماعا تولىق تىيىم سالۋدى كوزدەمەيدى، ءبىراق 200 ادامنان كوپ سىيىمدىلىعى بار ءىس-شارالاردى قامتيدى. ارنايى دىبىس قۇرال-جابدىقتارى جوق نەمەسە بەيىمدەلمەگەن الاڭداردا فونوگرامما قولدانۋعا رۇقسات ەتىلەدى.

"باستى ماقسات - كورەرمەن قۇقىعىن قورعاۋ. بيلەتكە 25–50 مىڭ تەڭگە تولەگەن ادام شىنايى ونەردى كورىپ، ءانشىنىڭ كاسىبي دايىندىعىن باعالاي الۋى كەرەك. "اۋزىن جىبىرلاتقان" ءارتىس تىڭداۋعا جول بەرىلمەۋگە ءتيىس"، - دەدى زايىت. 

دەپۋتاتتىڭ ايتۋىنشا، زاڭسىز فونوگرامما پايدالانعان جاعدايدا جاۋاپكەرشىلىك ءىس-شارا ۇيىمداستىرۋشىلارىنا جۇكتەلەدى. بۇل - كونسەرتكە كەلىسىمشارت جاسايتىن، ساحنانى جالدايتىن جانە بيلەت ساتاتىن تۇلعالار. قازىرگى ۇسىنىسقا سايكەس، ايىپپۇل كولەمى 1 000 ايلىق ەسەپتىك كورسەتكىشكە (شامامەن 3،5 ملن تەڭگە) دەيىن جەتۋى مۇمكىن.

جاڭا نورمالار مادەني ءىس-شارالاردىڭ ساپاسىن ارتتىرۋدى جانە كورەرمەننىڭ اقشاسىنا لايىقتى دەڭگەيدە ونەر كورسەتۋىن قامتاماسىز ەتۋدى ماقسات ەتەدى.