جەكە تۇلعالارعا 150 اەك (553،8 مىڭ تەڭگە)، زاڭدى تۇلعالارعا 300 اەك (1،1 ملن تەڭگە) كولەمىندە ايىپپۇل سالۋدى ۇسىنىلىپ وتىر.
مادەنيەت جانە اقپارات مينيسترلىگى ازاماتتار تاراپىنان تۇسكەن شاعىمداردى ەسكەرىپ، زاڭعا تۇزەتۋ ەنگىزبەك، دەپ حابارلايدى Almaty-akshamy.kz
ۆەدومستۆوعا كونسەرتتىك ءىس-شارالاردىڭ تومەن ساپاسىنا، اتالعان كونسەرت ۇيىمداستىرۋشىلارىنىڭ جاۋاپسىزدىعىنا، قازاقستاندىق جانە شەتەلدىك ارتىستەردىڭ شىعارماشىلىعىنىڭ ساپاسىنا جانە تارتىبىنە قاتىستى ماسەلەلەر ءجيى جولدانادى.
اتاپ ايتقاندا، 2022-2024 جىلدارى شەتەلدىك جانە وتاندىق ارتىستەردىڭ قاتىسۋىمەن بولعان جانجالدى وقيعالار ۇلكەن قوعامدىق رەزونانس تۋدىردى جانە الەۋمەتتىك جەلىلەردە كوپتەگەن تەرىس پىكىرلەر جازىلادى.
قازاقستاندىق ورىنداۋشىلارعا قاتىستى، 2022 جىلى ساحنانى قورلاپ، كوپشىلىكتىڭ الدىندا بىلاپىت سوزدەر ايتقان يرينا كايراتوۆنانىڭ كومانداسى مەن Shiza دەگەن اتپەن بەلگىلى اسحات جولشييەۆ سىنعا قالدى. مەملەكەتتىك رامىزگە دەگەن قۇرمەتسىزدىگى قوعامنىڭ اشۋىن تۋدىردى. 2022 جىلعى ناۋرىزدا سەمەيدە قازاقستاننىڭ حالىق ءارتىسى روزا رىمبايەۆانىڭ كونسەرتىنە بايلانىستى وقيعا، پاۆلوداردا تانىمال ءارتىس تورەعالي تورەالىنىڭ ارەكەتى داۋ تۋدىرعانى بەلگىلى.
سونداي-اق امەريكالىق ورىنداۋشىلار Akon، 50 Cent-كە قاتىستى قىزۋ تالقى بولدى. اتالعان وقيعالار شوۋ-بيزنەس وكىلدەرىنىڭ مورالدىق-ادەپتىك مىنەز-قۇلقىنا قاتىستى كوپتەگەن پىكىر-تالاس تۋدىردى.
سوندىقتان كوپشىلىك كونسەرتتىك قىزمەتتى رەتتەۋگە قاتىستى زاڭنامانى جەتىلدىرۋدى جانە ارتىستەر مەن ءىس-شارالاردى ۇيىمداستىرۋشىلاردىڭ جەكە جاۋاپكەرشىلىگىن بەلسەندى تۇردە تالاپ ەتۋدە.
ويىن-ساۋىق مادەني-بۇقارالىق ءىس-شارالاردى وتكىزۋ بارىسىندا كورەرمەندەرمەن قارىم-قاتىناس كەزىندە ارتىستەردىڭ نورماتيۆتىك ەمەس لەكسيكانى قولدانۋ، الكوگولدىك ىشىمدىكتەردى ءىشۋ، الكوگولدىك جانە/نەمەسە ەسىرتكىلىك ماساڭ كۇيدە بولۋ، سونداي-اق پسيحوتروپتىق زاتتاردىڭ، ولاردىڭ انالوگتارى مەن پرەكۋرسورلارىنىڭ اسەرىنەن ورىن الاتىن مىنەز-قۇلقىن تانىتقانى ءۇشىن جەكە تۇلعالار مەن زاڭدى تۇلعالارعا ايىپپۇل سالىنادى، - دەلىنگەن زاڭ جوباسىندا.
مينيسترلىك جەكە تۇلعالارعا 150 اەك (553،8 مىڭ تەڭگە)، زاڭدى تۇلعالارعا 300 اەك (1،1 ملن تەڭگە) كولەمىندە ايىپپۇل سالۋدى ۇسىنىپ وتىر.
ءبىر جىل ىشىندە وسىنداي بۇزۋشىلىق قايتالانسا، جەكە تۇلعالارعا 200 اەك (738،4 مىڭ تەڭگە)، زاڭدى تۇلعالارعا 600 اەك (2،2 ملن تەڭگە) كولەمىندە ايىپپۇل سالۋدى زاڭمەن بەكىتەدى.