ەندى بالانى ءبىر مەكتەپتەن ەكىنشىسىنە ۇيدەن شىقپاي-اق اۋىستىرۋعا بولادى

ەلىمىزدە بالالاردى مەكتەپتەر اۋىستىرۋ بويىنشا مەملەكەت قىزمەت اۆتوماتتاندىرىلدى.

ەندى اتا-انالار مەن زاڭدى وكىلدەر بالانى ءبىر مەكتەپتەن ەكىنشى مەكتەپكە اۋىستىرۋدى ۇيدەن شىقپاي-اق، eGov.kz پورتالىندا جۇزەگە اسىرا الادى. وندا تۇرعىلىقتى جەرى بويىنشا نەمەسە ودان تىس جەرلەردە كورسەتىلگەن كەز كەلگەن ءبىلىم بەرۋ ۇيىمىن تاڭداۋ مۇمكىندىگى بەرىلەدى، دەپ حابارلايدى aqshamnews.kz.

وقۋ-اعارتۋ مينيسترلىگىنىڭ مالىمەتىنشە، جاڭا پروسەسس ەسەپتەن شىعارۋ جانە بەكىتۋ تالوندارىن، سونداي-اق جەكە ءىس قۇجاتتارىن تاپسىرۋدى قاجەت ەتپەيدى. مەكتەپ تاڭداعان كەزدە وقۋ ءتىلى دە كورسەتىلەدى. سونداي-اق ءوتىنىش بەرۋشىنىڭ ءوتىنىمدى قايتارىپ الۋعا مۇمكىندىگى بار.

مەملەكەتتىك قىزمەتتى الۋ ءۇشىن:

* eGov.kz پورتالىندا تىركەۋدەن ءوتىپ، «ءبىلىم» بولىمىنە ءوتۋ كەرەك؛
* «ورتا ءبىلىم» بولىمىندە «بالالاردى مەكتەپتەن مەكتەپكە اۋىستىرۋ ءۇشىن قۇجاتتاردى قابىلداۋ» مەملەكەتتىك قىزمەتىن تاڭداپ، قاجەتتى جولداردى تولتىرۋ جانە ەسق كومەگىمەن وتىنىشكە قول قويۋ قاجەت؛
* قىزمەت ناتيجەسىمەن جەكە كابينەتتە تانىسۋعا بولادى.

ايتا كەتەيىك، جاڭا مەملەكەتتىك قىزمەت ءتۇرىن ق ر وقۋ-اعارتۋ مينيسترلىگى مەن ق ر ءسدياوم، «احمەت بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى» اق جانە «ۇلتتىق اقپاراتتىق تەحنولوگيالار» اق بىرلەسىپ ازىرلەدى.