سۋ رەسۋرستارى جانە يرريگاسيا مينيسترلىگى سۋ سالاسى قىزمەتكەرلەرىن الەۋمەتتىك قولداۋ شارالارىن ازىرلەدى
سۋ رەسۋرستارى جانە يرريگاسيا مينيسترلىگى سۋ سالاسىندا جۇمىس ىستەيتىن ماماندارعا الەۋمەتتىك قولداۋ كورسەتۋ ءۇشىن ءبىرقاتار ءىس-شارالار ازىرلەدى. اتاپ ايتقاندا، مينيسترلىك «تابيعي مونوپوليالار تۋرالى» زاڭعا وزگەرىستەر ەنگىزۋدى ۇسىندى. بۇل وزگەرىستەر سۋ سالاسى قىزمەتكەرلەرىنىڭ ەڭبەكاقىسىن ەلەكتر جانە جىلۋ سالاسىندا ىستەيتىن مامانداردىڭ جالاقىسىمەن تەڭەستىرۋگە باعىتتالعان.
قازىرگى ۋاقىتتا زاڭ جوباسى سەناتتىڭ قاراۋىنا جىبەرىلدى. تۇزەتۋلەر قابىلدانعان جاعدايدا، ول 2025 جىلدىڭ ەكىنشى جارتىسىندا سۋ سالاسى قىزمەتكەرلەرىنىڭ جالاقىسىن 50%-عا دەيىن وسىرۋگە مۇمكىندىك بەرەدى. بۇل سالادا كادر تاپشىلىعىن ازايتىپ، بىلىكتى مامانداردى تارتۋعا كومەكتەسەدى.
مەملەكەت باسشىسى جاريالاعان «جۇمىسشى ماماندىقتار جىلى» اياسىندا سۋ رەسۋرستارى جانە يرريگاسيا مينيسترلىگى سالالىق جوسپار ازىرلەدى. وندا جاڭا جۇمىس ورىندارىن اشۋ، كاسىبي ستاندارتتاردى دايىنداۋ جانە مامانداردىڭ بىلىكتىلىگىن ارتتىرۋ جۇمىستارى قامتىلعان. مۇنداي ءىس-شارالاردى جىل سايىن وتكىزۋ جوسپارلانىپ وتىر.
جۇڭگو، فرانسيا، يزرايل، نيدەرلاند جانە اقش سياقتى ەلدەرمەن قازاقستاندىق كادرلاردى قايتا دايارلاۋ بويىنشا كەلىسىمدەر جاسالدى. ءقازىردىڭ وزىندە ونداعان مامان شەتەلدە وقىپ كەلدى. بۇل رەتتە بارلىق شىعىندى قابىلداۋشى تاراپتار وتەدى.
سونداي-اق «جۇمىسشى ماماندىقتار جىلى» اياسىندا «وتباسى بانك» سۋ شارۋاشىلىعى سالاسى ماماندارىنا جەڭىلدەتىلگەن شارتتارمەن تۇرعىن ءۇي ساتىپ الۋعا مۇمكىندىك بەرەتىن يپوتەكالىق باعدارلامانى ىسكە قوستى.
«ديپلوممەن اۋىلعا» باعدارلاماسىنا «گيدروتەحنيك-ينجەنەر»، «سۋ رەسۋرستارى جانە سۋ پايدالانۋ»، «مەليوراسيا، رەكۋلتيۆاسيا جانە جەردى قورعاۋ» ماماندىقتارى قوسىلدى. اۋىلعا قونىس اۋدارعان سۋ ماماندارىنا بەرىلەتىن بيۋدجەتتىك نەسيە كولەمى 7،8 ملن تەڭگەگە دەيىن ۇلعايتىلدى.
سونىمەن بىرگە «ق ر مەملەكەتتىك ناگرادالار تۋرالى» زاڭىنا تولىقتىرۋلار ەنگىزىلدى. سۋ شارۋاشىلىعى سالاسىنىڭ دامۋىنا ەلەۋلى ۇلەس قوسقان ماماندارعا «قازاقستاننىڭ سۋ شارۋاشىلىعى سالاسىنىڭ ەڭبەك سىڭىرگەن قايراتكەرى» اتاعى بەرىلەدى.
«قازاقستاننىڭ سۋ شارۋاشىلىعى سالاسىندا 10 مىڭعا جۋىق ادام ەڭبەك ەتەدى. ولارعا قولايلى ەڭبەك جاعدايىن جاساپ، لايىقتى جالاقىمەن قامتاماسىز ەتۋ ءبىز ءۇشىن ماڭىزدى. سۋ شارۋاشىلىعى سالاسى ماماندارىن الەۋمەتتىك قولداۋ، سونداي-اق ولاردى قايتا دايارلاۋ ينفراقۇرىلىمدى دامىتۋ مەن نورماتيۆتىك قۇقىقتىق بازانى جەتىلدىرۋدەن كەم ەمەس. بىلتىر 7 مىڭنان استام ادامنىڭ جالاقىسى ورتا ەسەپپەن 25%-عا ءوستى. سۋ شارۋاشىلىعى ماماندىعىنىڭ بەدەلىن ارتتىرۋ ءۇشىن مينيسترلىك بۇل باعىتتاعى جۇمىستى جالعاستىرا بەرەدى»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.