ەڭبەك مينيسترلىگى ەلىمىزدە قانداي ماماندار جەتىسپەيتىنىن ايتتى

رەسەيلىك ماماندار جۇمىس ىستەيدى، ۋاقىتشا تۇرۋعا تىركەلەدى.

13 جەلتوقساندا ق ر ەڭبەك جانە حالىقتى الەۋمەتتىك قورعاۋ مينيسترلىگى ەلگە قانداي ماماندار قاجەت ەكەنىن ايتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.

ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس سپانوۆتىڭ ايتۋىنشا، ءبىرىنشى كەزەكتە قازاقستاندا ينجەنەرلەر جەتىسپەيدى.

"كوبىنە بىزگە ونەركاسىپ ونىمدەرىن وڭدەيتىن وتە ءدال ماماندار – ينجەنەرلەر قاجەت. سونىمەن قاتار مەديسينا سالاسىنىڭ ماماندارى، ونەركاسىپتە جاڭا تەحنولوگيالاردى قولدانۋ ءۇشىن ۇجىمدى وقىتاتىن مۇعالىمدەر، ونەركاسىپ ماماندارى قاجەت"، - دەدى ءىلياس سپانوۆ.

جۋرناليست ەڭبەك مينيسترلىگىنىڭ وكىلىنەن رەسەيلىك ميگرانتتار اعىنى كادرلارداعى ولقىلىقتى جاپتى ما دەپ سۇرادى.

"بۇگىندە مۇندا رەسەيلىك ماماندار جۇمىس ىستەيدى، ۋاقىتشا تۇرۋعا تىركەلەدى. ەاەو كەلىسىمىنە سايكەس، 2015 جىلدان باستاپ ەاەو-نىڭ ءتورت مەملەكەتىنىڭ تۇرعىندارى رۇقساتسىز كەلىپ جۇمىس ىستەي الاتىنىن تۇسىنەمىز"،- دەدى ول.

بۇعان دەيىن ەڭبەك مينيسترلىگى ءقازىر قازاقستاندا 298 مىڭ رەسەي ازاماتى بار ەكەنىن، ونىڭ 30 مىڭى رەسمي تۇردە جۇمىسقا ورنالاسقانىن حابارلاعان.