بيىل ءجۇز جاسقا تولىپ، عاسىرمەن قۇرداس اتانىپ وتىرعان كەرەمەت تۇلعا – ءسارۋار عاني قىزى مۇحامادەيەۆانى ءوزىنىڭ تابىستى ەڭبەك جولىمەن جاستاردى شابىتتاندىرۋدىڭ ۇلگىسى دەۋگە بولادى. ول ءومىرىنىڭ جارتى عاسىرىندا جەر قاتىناستارى جانە جەرگە ورنالاستىرۋ جونىندەگى مەملەكەتتىك عىلىمي-وندىرىستىك ينستيتۋتىندا ادال قىزمەت ەتكەن اياۋلى جان. بۇگىن مەرەيتوي يەسىن بۇرىنعى ارىپتەستەرى ۇيىنە بارىپ قۇتتىقتاپ، دەنساۋلىق تىلەدى.
ءسارۋار مۇحامادەيەۆانىڭ ەڭبەك جولى جوعارى جاۋاپكەرشىلىكپەن، كاسىبيلىكپەن جانە ادالدىقپەن ەرەكشەلەنەدى. ەڭبەك كىتاپشاسىنداعى جالعىز جازبا ونىڭ جەر قاتىناستارى جانە جەرگە ورنالاستىرۋ جونىندەگى مەملەكەتتىك عىلىمي-وندىرىستىك ينستيتۋتىندا 50 جىل بويى تاباندى دا تابىستى ەڭبەك ەتكەنىن كورسەتەدى. وسى ۋاقىت ىشىندە ول جاس ماماننان ارىپتەستەرىنىڭ قۇرمەتىنە يە بولعان ابىرويلى، جوعارى بىلىكتى قىزمەتكەرگە دەيىنگى جولدان ءوتتى.
ءسارۋار عاني قىزى جەرگە ورنالاستىرۋدا يننوۆاسيالىق ادىستەر مەن تەحنولوگيالاردى ازىرلەۋگە جانە ەنگىزۋگە ەلەۋلى ۇلەس قوستى. ونىڭ كاسىبيلىگى مەن تاجىريبەسى ول قاتىسقان بارلىق جوبالاردا تابىسقا جەتۋدىڭ اجىراماس فاكتورلارى بولدى. ونىڭ ارىپتەستەرى مەن باسشىلارى ونىڭ كاسىبيلىك، جاۋاپكەرشىلىك جانە ۇقىپتىلىق دەڭگەيىن ءارقاشان جوعارى باعالادى.
وسىنداي جاندى ۇمىتۋ مۇمكىن ەمەس. 100 جاساپ وتىرعان قاريا بارلىق قۇرمەتكە لايىقتى. ءقازىر ءسارۋار اجەي قىزى ءلايلا كوكۋبايەۆانىڭ قامقورلىعىندا.
«ءسارۋار عاني قىزى اينالاسىنداعى جانداردىڭ وتباسىلىق جاعدايىنا دا الاڭداپ، قامقور بولىپ جۇرەتىن. قانشاما جاستىڭ ماتەريالدىق جاعدايىنىڭ جاقسارۋىنا ولشەۋسىز ۇلەس قوستى. ال وزىنە كەلگەندە پاتەر سۇراپ نەمەسە دەربەس زەينەتاقى الامىن دەپ ۇمتىلماعان جان. بۇل قاسيەتى كوپكە ۇلگى بولۋعا ءتيىس»، – دەيدى 40 جىلداي بىرگە جۇمىس ىستەگەن ارىپتەسى باقىتكۇل دۇيسەنبەكوۆا.
ال داپويكير ديرەكتورى بولات جىلقىبەكوۆ: «ءبىز جەرگە ورنالاستىرۋ سالاسىنا ۇلەس قوسقان اعا ۇرپاق ەڭبەگىن ۇمىتپايمىز. ءسارۋار عاني قىزى ەڭبەك ەتكەن مەكەمە بۇگىندە «ازاماتتارعا ارنالعان ۇكىمەت» مەملەكەتتىك كورپوراسياسى قۇرامىندا. كورپوراسيا باسشىلىعى وسى سالاعا جەتەكشىلىك ەتەتىن باسقارما ءتوراعاسىنىڭ ورىنباسارى عالىم قارقىنبايەۆتىڭ تاپسىرماسىمەن ارداگەرىمىزدى مەرەيتويىمەن قۇتتىقتاپ، باسشىلىقتىڭ مەدالى مەن قۇتتىقتاۋىن تاپسىردىق. اعا ۇرپاقتىڭ ونەگەلى ءىسى جاستارعا اركەز ۇلگى جانە ۇمىتىلماق ەمەس»، – دەگەن ىقىلاسىن جەتكىزدى.