شىلدە ايىندا بوس ورىندار مەن جۇمىس ىزدەۋشىلەر اراسىنداعى الشاقتىق ساقتالدى، ال ورنالاستىرىلعان رەزيۋمەلەر ەەب-داعى سۇرانىستىڭ تەك 59%-ىن عانا قامتىدى.
«ەڭبەك رەسۋرستارىن دامىتۋ ورتالىعى» اق مالىمەتى بويىنشا، شىلدە ايىندا ەلەكتروندىق ەڭبەك بيرجاسىندا 81،7 مىڭ بوس جۇمىس ورنى جانە 47،9 مىڭ رەزيۋمە ورنالاستىرىلعان، دەپ حابارلايدى Almaty-akshamy.kz
ماۋسىم ايىمەن سالىستىرعاندا، ەەب-داعى بوس جۇمىس ورىندارىنىڭ جالپى سانى 15%-عا، ال رەزيۋمەلەر سانى 3%-عا ازايدى. جەكەلەگەن ماماندىقتارعا كەلەتىن بولساق، بوس جۇمىس ورىندارى سانىنىڭ ەڭ ەلەۋلى ءوسۋى ساۋالناما جۇرگىزۋ جونىندەگى سۇحباتتاسۋشى (+2،2 مىڭ)، حات الماسۋ جونىندەگى كومەكشى (+0،9 مىڭ) جانە ستاتيست (+0،6 مىڭ) سياقتى كاسىپتەر بويىنشا بايقالدى. بىلىكتىلىگى جوق ەڭبەككە بايلانىستى كاسىپتەر اراسىندا بوس جۇمىس ورىندارىنىڭ ءوسۋى تاۋارلاردى جيناقتاۋشى، بازارداعى ساتۋشى جانە ءبۋىپ-تۇيۋشى تۇرعىسىندا اتالىپ وتىر.
سونىمەن قاتار، ورنالاستىرىلعان رەزيۋمەلەردىڭ قارقىنى كورسەتكەندەي، شىلدە ايىندا كىشى مەديسينالىق قىزمەتكەرلەر مەن مەكتەپ وقىتۋشىلارى اراسىندا بەلسەندىلىكتىڭ ارتۋى بايقالادى. ماسەلەن، ءبىر اي ىشىندە ەەب-داعى فەلدشەرلەر رەزيۋمەسىنىڭ سانى 421 بىرلىككە، مەيىرگەرلەر – 237 بىرلىككە، باستاۋىش سىنىپ، شەت ءتىلى، دەنە شىنىقتىرۋ جانە سپورت مۇعالىمدەرى تيىسىنشە 283، 271 جانە 266 بىرلىككە ءوستى. پەداگوگيكالىق قىزمەتكەرلەر اراسىنداعى بەلسەندىلىكتى جاڭا وقۋ جىلىنىڭ جاقىنداۋىمەن بايلانىستىرۋعا بولادى.
ەەب-داعى رەزيۋمەلەر مەن بوس ورىندار سانىن سالىستىرۋ، بىلىكتى ەڭبەك رەسۋرستارىنا سۇرانىستىڭ وزگەرگەنىن كورسەتەدى. شىلدە ايىندا كۇزەتشىلەرمەن، اۆتوكولىك جۇرگىزۋشىلەرىمەن جانە سانيتارلارمەن قاتار، ساۋالناما جۇرگىزۋ بويىنشا جوعارىدا ايتىلعان سۇحباتتاسۋشىلارعا (2595 بوس ورىنعا 48 رەزيۋمە)، حات الماسۋ بويىنشا كومەكشىلەرگە (1 رەزيۋمە جانە 923 بوس ورىن) جانە ستاتيستەرگە (10 رەزيۋمە جانە 665 بوس ورىن) تاپشىلىق بايقالدى. بىلىكتىلىكتى قاجەت ەتپەيتىن ەڭبەككە سۇرانىس وتكەن كەزەڭدەردەگىدەي وزگەرىسسىز قالدى – ەەب-دە جۇك تۇسىرۋشىلەردىڭ، قارا جۇمىسشىلاردىڭ، اس ءۇي جۇمىسشىلارى مەن اۋلا سىپىرۋشىلاردىڭ جەتىسپەۋشىلىگى بايقالادى.