ەڭبەكقورلىق تاباندىلىقتان تۇرادى
حالىقتا «ەڭبەكتىڭ نانى ءتاتتى» دەپ جاتادى. بۇعان قاتىستى مىسالدار، وقيعالار جەتەرلىك. سوڭعى ۋاقىتتا وسى تاقىرىپ ءجيى كوتەرىلىپ ءجۇر. ونىسى ورىندى. تەرەڭىرەك بارعاندا كوشەنىڭ تازالىعى، ەگىننىڭ بىتىك بولۋى، عىلىمنىڭ ورلەۋى ءبارى-بارى ەڭبەك ادامىنىڭ قولىمەن جاسالادى. اسىرەسە، وسى جىلى ءبىرقاتار جاندار تاۋەلسىزدىك مەرەكەسى قارساڭىندا ماراپات يەلەندى. بۇل – ەتكەن ەڭبەكتىڭ جەمىسى.
ەڭبەك – ءومىر. ەڭبەك ەتە ءبىلۋ – ونەر ءھام ءومىر. رەتى كەلگەن شارۋانى اتقارا بەرۋگە بولادى. ءبىراق، ونىڭ ارا-جىگىن اجىراتىپ، ماقساتتى جۇمىس جاساۋ ەكىنشى ءبىر اڭگىمە سانالادى. تاڭنان كەشكە دەيىن جەر قازىپ، تاس قىرناپ، اۋىر كوتەرۋگە دە قاۋقار كەرەك. دەسە دە، ءومىر-باقي بۇنى قايتالاپ، تۇك وندىرمەسەڭىز، ءتۇبى قۇر دالباسا بولماق. بۇنىمەن وسىنداي شارۋانى ىستەۋگە بولمايدى دەۋدەن قاشىقپىز. دەگەنمەن، ءاربىر ادامنىڭ ءوز تاڭداۋى بولادى.
كوبىمىزدىڭ كوز الدىمىزعا وسى ءسوزدى ايتقاندا جوعارىداعى جۇمىستار ەلەستەيدى. ءبىراق، ءىشىنارا وي ەڭبەگى، قول ەڭبەگى، قاجىر-قايراتتى تالاپ ەتەتىن ىستەر، ت.ب دەپ بولىنەتىنى انىق. بىلاي ساراپتاپ قاراساڭىز، وسىلاردىڭ ءبارىن ءجۇردىم-باردىم اتقارساق، ارعى جاعى قالاي بولماق؟ كىم ناتيجەلى تىرلىك قىلماق؟ مەيلىنشە وسىعان اركىم وزىنشە تالداۋ جاساعانى ابزال.
ناتيجەلى ءىس. الگىدەن بەرى ءبىرقاتار ويلاردى قوزعادىق. جىك-جىككە ءبولىپ توپتاستىردىق. قىسقاشا تالدادىق. ەندىگى تالقى ناتيجەگە تىرەلەدى. جاس كۇنىڭنەن باستاپ ءبىر مەكەمەدە قىزمەت ەتسەڭىز نەمەسە كاسىپ اشىپ، ءىس قىلساڭىز، پايداسىن كورەسىز. ءسوزىمىز جاندى بولۋ ءۇشىن الەمگە تانىمال، جولى بولعان كاسىپكەرلەر دجەف بەزوس، بيلل گەيتس، مارك سۋكەربەرگتى ايتۋعا بولادى. بۇل اتاقتى جاندار دۇنيەنىڭ قارجىلىق، اقپاراتتىق، ماركەتينگتىك جۇيەسىنىڭ شىڭىن ۇستاپ وتىرعاندار. وسىلاردى تانيتىن، ىستەرىنە ەلىكتەيتىن، ۇقساپ باققىسى كەلەتىندەر ميلليونداپ سانالادى. ناعىز ءوز ءىسىنىڭ شەبەرلەرى دەسەك، ءدوپ مەڭزەگەندىك بولار ەدى.
ءتۇيىن. امەريكاندىق مەملەكەت قايراتكەرى ءارى ديپلومات، عالىم بەندجامين فرانكلين «ەڭبەك – باقىتتىڭ اتاسى» دەيدى. توبىقتاي ءسوزدىڭ ءتۇپ اتاسىن وسىلاي تۇيىندەۋگە بولادى. ارعى جاعىن اركىم ءوزى پايىمدايدى دەمەكپىز.