2025 جىل قازاقستاندا جۇمىسشى ماماندىقتار جىلى بولىپ جاريالاندى. بۇل باستاما ەلىمىزدىڭ ءبىلىم بەرۋ جۇيەسى مەن ەڭبەك نارىعىنا تىڭ سەرپىن بەرىپ وتىر.
ەڭ الدىمەن، وڭىرلەردە جۇمىسشى كادرلاردى دايارلاۋدىڭ ساپاسىن ارتتىرۋعا باعىتتالعان ناقتى جوسپارلار قابىلداندى. تەحنيكالىق جانە كاسىپتىك ءبىلىم بەرۋ سالاسىنا ەرەكشە كوڭىل ءبولىنىپ، كوللەدجدەردىڭ ماتەريالدىق-تەحنيكالىق بازاسى جاڭارتىلۋدا. ستۋدەنتتەرگە ارنالعان جاڭا جاتاقحانالار سالىنىپ، وقۋ ورىندارى زاماناۋي قۇرال-جابدىقتارمەن قامتاماسىز ەتىلۋدە.
جاستاردىڭ جۇمىسشى كاسىپتەرگە دەگەن قىزىعۋشىلىعىن ارتتىرۋ ماقساتىندا مەكتەپتەردە كاسىبي باعدار بەرۋ كەڭىنەن جولعا قويىلدى. بۇگىنگى تاڭدا بۇل باعىتتاعى جۇمىسقا 2،5 ميلليونعا جۋىق وقۋشى قامتىلعان. سونىمەن قاتار، دۋالدى وقىتۋ جۇيەسى ارقىلى ستۋدەنتتەر بىلىممەن بىرگە تاجىريبە جيناقتاۋدا. ەل بويىنشا 100 مىڭنان استام ستۋدەنت كاسىپورىنداردا تاجىريبەدەن وتۋدە، ال حالىقارالىق ستاندارتتارعا ساي وقۋ ورتالىقتارى اشىلىپ، جاستاردىڭ شەبەرلىگىن شىڭداۋعا جول اشىلدى.
جۇمىسشى ماماندارعا دەگەن سۇرانىستى قامتاماسىز ەتۋ ءۇشىن جاڭا ءبىلىم بەرۋ باعدارلامالارى ەنگىزىلدى. كاسىپورىنداردىڭ تاپسىرىسى بويىنشا وقىعان تۇلەكتەرگە جۇمىسقا ورنالاسۋ كەپىلدىگى بەرىلەدى. جىل سايىنعى قابىلداۋ جوسپارى دا كەڭەيىپ، قوسىمشا 15 مىڭ ورىن ءبولىندى. ناتيجەسىندە، بيىلدىڭ وزىندە مىڭنان استام كوللەدج تۇلەگى ەلىمىزدىڭ ءىرى كاسىپورىندارىندا ەڭبەككە كىرىستى.
سونىمەن قاتار، ەڭبەك ادامدارىنا الەۋمەتتىك قولداۋ شارالارى كۇشەيتىلدى. جۇمىسشى ماماندىق يەلەرى ءۇشىن جەڭىلدەتىلگەن يپوتەكالىق باعدارلامالار ىسكە قوسىلدى. بۇل شارا جاستاردىڭ ەڭبەككە ىنتاسىن ارتتىرىپ قانا قويماي، ەلدىڭ الەۋمەتتىك تۇراقتىلىعىنا دا ىقپال ەتپەك.
جۇمىسشى ەڭبەگىنىڭ ءقادىرىن ارتتىرۋ – مەملەكەتتىڭ باستى ماقساتتارىنىڭ ءبىرى. جاڭا باستامالار جاس ۇرپاققا ەڭبەكقورلىق پەن كاسىبيلىك قۇندىلىعىن دارىپتەپ، قوعامداعى جۇمىسشى مارتەبەسىن بيىكتەتەتىنى ءسوزسىز.