قازاقستاندىق ستۋدەنتتەر قىرعىز رەسپۋبليكاسىندا ءوتىپ جاتقان III تۇركى ۋنيۆەرسياداسىندا جوعارى سپورتتىق ناتيجەلەر كورسەتىپ، ەلىمىزدىڭ ابىرويىن اسقاقتاتتى.
وتاندىق جوعارى وقۋ ورىندارىنىڭ وكىلدەرى بىرنەشە جۇلدەلى ورىندارعا يە بولدى، - دەپ حابارلايدى Aqshamnews.kz.
ۇستەل تەننيسىنەن جارىستا قازاقستاننىڭ ەرلەر كومانداسى التىن مەدال جەڭىپ الدى. كوماندا قۇرامىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى نۇرعالي نۇرداۋلەت جانە قازاقستان-امەريكاندىق ەركىن ۋنيۆەرسيتەتىنىڭ ستۋدەنتى تەمىرلان جيەنبايەۆ بار. قىزدار كومانداسى دا جۇلدەگەرلەر قاتارىنان كورىنىپ، قولا مەدال جەڭىپ الدى. ەل نامىسىن ءال-فارابي اتىنداعى قازۇۋ ستۋدەنتى ارۋجان بەكىش پەن قبتۋ ستۋدەنتى ەكاتەرينا پيۋركو قورعادى.
ەركىن كۇرەس بويىنشا قازاقستان دا ۇزدىك ناتيجەلەرگە قول جەتكىزدى. التىن مەدالدى قازاق سپورت جانە تۋريزم اكادەمياسىنىڭ ستۋدەنتى اميرحان داۋلەت يەلەنسە، كۇمىس مەدالدى ءال-فارابي اتىنداعى قازۇۋ ستۋدەنتى اكەجان ايتبەكوۆ جەڭىپ الدى.
گرەك-ريم كۇرەسىندە Central Asian Innovative University ستۋدەنتى ومار ساتايەۆ التىن مەدالعا يە بولدى.