فيلم ءۇش جىل بويى الماتى، تۇركىستان وبلىسى، اقتاۋ جانە تايلاندتا ءتۇسىرىلدى
ۇلتتىق كينونى قولداۋ مەملەكەتتىك ورتالىعىنىڭ قولداۋىمەن مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن رەجيسسەر ەمير ءبايعازيننىڭ «ءومىر» ءفيلمى قازاقستاننىڭ وسكار كوميتەتىنىڭ شەشىمىمەن امەريكالىق «وسكار» كينواكادەمياسىنىڭ سىيلىعىنا «شەت تىلىندەگى ۇزدىك فيلم» نوميناسياسىندا ۇسىنىلدى، دەپ حابارلايدى Almaty-akshamy.kz.
ءبايعازيننىڭ جاڭا كارتيناسىنىڭ الەمدىك پرەمەراسى وسى كۇندەرى ءوتىپ جاتقان بەدەلدى تورونتو كينوفەستيۆالىنىڭ «زاماناۋي الەمدىك كينو» سەكسياسىندا ورىن الدى.
فيلم ءۇش جىل بويى الماتى، تۇركىستان وبلىسى، اقتاۋ جانە تايلاندتا ءتۇسىرىلدى. كارتينا تاعدىرلارى قيىلىسىپ، ءبىر كالەيدوسكوپتى قۇرايتىن ادامداردىڭ اراسىندا ءجۇرىپ، ءتۇرلى وقيعالار تىزبەگىنە تاپ بولاتىن كەيىپكەر تۋرالى باياندايدى.
باستى ءرولدى ەركەبۇلان تاسىنوۆ سومداعان. ءبايعازيننىڭ ءوزى جوبادا سەناريي اۆتورى، رەجيسسەر، وپەراتور جانە پروديۋسەر بولدى.
«بۇل ءفيلمنىڭ يدەياسى ماعان ون جىل بۇرىن العاشقى كارتينامدى تۇسىرۋگە دايىندالىپ جاتقاندا كەلدى. كەيىپكەردىڭ باسىنا تۇسكەن قيىندىقتارعا قاراماستان، مەن ءارقاشان بۇل وقيعانى ومىرگە دەگەن ماحابباتقا تولى دەپ سانايتىنمىن»، - دەدى رەجيسسەر.
ەمير بايعازين 2013 جىلى ءار ءتۇرلى فەستيۆالدەردە 25-تەن استام ماراپاتتارعا يە بولعان «ۋروكي گارمونيي» كارتيناسىمەن الەمدىك كينو الاڭىنا شىقتى. سول جەتىستىكتەردىڭ اراسىندا قازاقستاننىڭ العاشقى العان بەرلين كينوفەستيۆالىنىڭ «كۇمىس ايۋى» دا بار. كەيىن رەجيسسەردىڭ «رانەنىي انگەل» مەن «وزەن» فيلمدەرى شىقتى، باتىس جۇرتشىلىعى ونى جىلى قابىلدادى. «وزەن» ءفيلمىنىڭ الەمدىك پرەمەراسى 75ء-شى ۆەنەسيا كينوفەستيۆالىندە «كوكجيەكتەر» باعدارلاماسىندا كورسەتىلدى، وندا ەمير «ۇزدىك رەجيسسەر» رەتىندە ماراپاتتالدى.
95ء-شى رەت بەرىلەتىن امەريكالىق كينواكادەميا سىيلىعىنا ۇمىتكەرلەردىڭ ءتىزىمى 2023 جىلعى 24 قاڭتاردا جاريالانادى. ءراسىمنىڭ ءوزى 2023 جىلعى 12 ناۋرىزدا وتەدى.