ەلوردادا سيرەك كەزدەسەتىن ەسكى قولجازبالاردىڭ كورمەسى اشىلدى

قازاقستان تاۋەلسىزدىگىنىڭ 30 جىلدىعىنا وراي «ورتاعاسىرلىق جازبا دەرەكتەردەگى قازاق مەملەكەتى» اتتى كورمە ۇيىمداستىرىلدى

قازاقستان تاريحىنان سىر شەرتەتىن ەسكى جازبا-دەرەكتەردى زەرتتەيتىن عالىمداردىڭ تاپشىلىعى – بۇگىنگى كۇننىڭ ۇلكەن پروبلەماسى. بۇل تۋرالى بەلگىلى تاريحشى تىلەگەن سادىقوۆ قازاقستان تاۋەلسىزدىگىنىڭ 30 جىلدىعىنا وراي «ورتاعاسىرلىق جازبا دەرەكتەردەگى قازاق مەملەكەتى» اتتى كورمەنىڭ تۇساۋكەسەرىندە مالىمدەدى، دەپ حابارلايدى Almaty-akshamy.kz

تاريحشىنىڭ ايتۋىنشا، ەلىمىزگە قاتىستى قۇندى جادىگەرلەردى الىس-جاقىن شەت ەلدەردەن جيناۋ تاريحىمىزدى تەرەڭىرەك بىلۋگە، اقتاڭداق بەتتەرىن قايتا جازۋعا زور مۇمكىندىكتەر تۋعىزادى. بۇل يگى ىستەردىڭ بولاشاق ۇرپاق ءۇشىن الاتىن ورنى ەرەكشە بولماق.

«قازىرگى تاڭدا بۇل باستاماسى عانا دەپ ايتار ەدىم. مەنىڭشە، دەرەكتىك ماتەريالدى ءالى تولىق يگەرە الماۋىمىزدىڭ ەكى ءتۇرلى سەبەبى بار. بىرىنشىدەن، وسى ءتىلدى بىلەتىن، سونى يگەرەتىن عالىمداردىڭ، زەرتتەۋشىلەردىڭ جەتكىلىكسىز بولۋى. كەڭەس داۋىرىنەن ورىس ءتىلىن بىلسەڭ، كيرريليسامەن جازعاندى وقىساڭ سول جەتكىلىكتى دەگەن ۇعىم قالىپتاسىپ قالعان. اراب ءتىلىن جەتىك ءبىلۋ، پارسى ءتىلىن جەتىك ءبىلۋ، تۇرىكشە جازىلعان ماتەريالداردى زەرتتەۋ - قازىرگى عالىمداردىڭ الدىندا تۇرعان ۇلكەن مىندەت. ەكىنشىدەن، كەلىپ جاتقان دەرەكتەردىڭ، قۇجاتتاردىڭ جاعدايى بىردەي ەمەس، ىشىندە توزىعى جەتكەنى دە بار»، - دەدى تاريحشى تىلەگەن سادىقوۆ.

ايتا كەتەيىك، ەلوردادا كوپشىلىك نازارىنا ۇسىنىلعان كورمەگە قولجازبالار جانە سيرەك كىتاپتار ۇلتتىق ورتالىعىنىڭ قورىندا جيناقتالعان قازاقستان تاريحىنا قاتىستى سيرەك كىتاپتار، قازاق حاندارىنىڭ حاتتارى، كارتالار قويىلعان. كورمە جەلتوقسان ايىنىڭ سوڭىنا دەيىن جالعاسادى.