جۇرگىزۋشىلەر قالانى اينالا 90 شاقىرىمدى ءجۇرىپ ءوتتى
كەزىندە قايناعان تىرشىلىككە ارالاسىپ، ادامعا كومەكشى بولعان ءتۇرلى تەحنيكانىڭ زامانى ءوتىپ بارادى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ءبىراق ەسكىنىڭ كوزىن توزدىرماي، ساقتاپ جۇرگەندەر دە بار. رەتروكولىكتەردى بابىندا ۇستاپ، بۇگىنگە جەتكىزگەن شەبەرلەر اۆتوشەرۋ وتكىزدى. ەلوردالىق رەتروكولىكتەر ساپارعا شىقتى.
بۇل تەمىر تۇلپارلاردىڭ الدى بۇل ولكەگە سوناۋ تىڭ يگەرۋ جىلدارى جەتكىزىلگەن. ءقازىر دە سىنى كەتىپ تۇرعان جوق. جۇرگىزۋشىلەر قالانى اينالا 90 شاقىرىمدى ءجۇرىپ ءوتتى. بارلىعى –14 كولىك.
«ءقازىر ءبىز تەحنيكاعا جانە وسى جولداردى سالعان ادامدارعا قۇرمەت بىلدىرگىمىز كەلەدى. ءبىز مۇنداي اۆتوشەرۋلەرگە اركەز قاتىسىپ تۇرامىز. بۇل ۇزاق جىلعى قالىپتاسقان ءداستۇر»، - دەيدى رەتروكولىك جۇرگىزۋشىسى ۆلاديسلاۆ كارەلين.
تىڭ يگەرۋ ناۋقانى سوسياليزم تۇسىنداعى ءىرى قۇرىلىس ىسپەتتى. 1956 جىلى اقمولا وبلىسى 238 ميلليوننان استام پۇت استىق جيناعان. ونىڭ 180 مىڭنان استامى مەملەكەتتىك قابىلداۋ پۋنكتەرىنە جەتكىزىلدى. 1958 جىلعى كورسەتكىشتەر ودان دا ارتىق بولدى. سول كەزدە وبلىستىڭ كولحوزدارى مەن سوۆحوزدارى مەملەكەتكە 221 ميلليون 100 مىڭ پۇت بيداي جيناپ بەردى. مىنە، وسى استىقتى گاز-51، زيل 164 جۇك كولىكتەرى تاسىمالدى.
بۇل نەگىزىنەن ءتۇرلى موديفيكاسياداعى گاز-51، گاز-21 ۆولگا، گاز-69 كولىكتەرى جانە زيل -164. ەگەر بايقاساڭىز، ولاردىڭ تىركەۋىشىمەن بىرگە جۇرەدى. سونداي-اق جانارماي تاسىمالدايتىن كولىك بار - دەيدى كاسىپورىن ديرەكتورى ەرلان بارينوۆ.
رەتروكولىكتەردى قالپىنا كەلتىرۋدە ەڭ قيىنى قاجەت سايمان تابۋ. ويتكەنى بارلىعىندا ءقازىر ءتۇپنۇسقا بولشەكتەر تۇر. سوندىقتان شەبەرلەر مۇمكىندىك بولسا كونە كولىكتەردى وزگەرتپەي، باستاپقى قالپىندا ساقتاۋعا تىرىسادى.